喂喂喂！新界西，特別係屯門元朗天水圍嘅朋友，以後想食丼飯，唔使再山長水遠搭成個鐘車出九龍或者過海食喇！屯門都有喇！

（不過呢日咁啱加拿大打風冇貨返，變咗兩國海膽丼）

呢間餐廳開咗幾日㗎咋，主打丼飯，最吸引嘅一定係三國海膽丼飯，啲海膽多到密舖晒成個碗，仲可以選擇加多隻鵪鶉蛋喺面！叫三國海膽就係用咗3個國家嘅海膽：日本北海道紫海膽、加拿大海膽同韓國海膽。不過每日限量供應，想食到嘅就要早啲去排隊喇……

其餘嘅丼飯亦都好足料好大碗下，好似呢碗「一之重丼」咁，就總共有7款刺身喇：吞拿魚腩、海膽、蔥吞拿魚腩蓉、牡丹蝦同三文魚籽，再加兩款築地鮮魚，同樣都係密舖晒㗎。築地鮮魚每晚都唔同款，視乎當日返咗邊款新鮮貨啦，開飯仔試到嘅就係深海池魚同赤睦，好清甜好爽。全部刺身嘅質素算係中上，隻牡丹蝦仲好大隻肉汁好甜添，不過吞拿魚腩就略嫌有些少筋，未完全做到入口即溶嘅感覺。而白飯就加咗醋落去，濕濕地酸酸地咁。

仲有款黑麻麻嘅黑甕丼，就包括咗甜蝦、帆立貝、小柱、黑魚籽同黑松露，而成碗都係橙色嘅赤甕丼，就係三文魚、三文魚籽同蟹籽。

丼飯嘅價錢由$148至到$228，另配埋煙燻芝士同昆布湯。嗯，不過，成間舖頭好細間，得大約17個位左右，暫時冇得電話預訂，所以奉勸各位想食嘅朋友仔，一係就早少少去排隊，一係就打定少少底啦。開飯仔嘅親身經驗係由7:50pm開始排，等到9:40pm先有位啊嗚呀！

漁匠屋
地址: 屯門井財街21號協邦大廈地舖

文、相：Kar





其他新店介紹：
100%日本原產人氣蛋糕店登陸太古 Tea Time生日蛋糕有著落（有片）
人氣芝士撻專門店進軍觀塘 新出朱古力芝士撻一日限定（有片）
宇治抹茶老字號登陸尖沙咀 品嘗正宗抹茶真味




隨時接收最新資訊
讚好OpenRice專頁！