香港有咁多間日本餐廳，要喺當中突圍而出真係有啲難度。嚟緊天后會有一間Omakase（廚師發辦）嘅新日本餐廳開幕，賣點就係材料一星期有六日由日本築地空運到港，保證新鮮優質，包括北海道原隻海膽，鮪魚唔同刁鑽部位等等，你又有無興趣？
 

由有超過18年經驗，當中包括五星級酒店嘅Chris師傅坐鎮

位於天后嘅鮨豊將會喺星期六(1/4)開始試業，同豊洲水産海鮮丼専門店一樣，由做開批發嘅東京築地市場豊洲水産創立。不過今次係走Omakase路線，由有超過18年經驗嘅Chris師傅同佢嘅團隊，以唔同新鮮海產同食材帶嚟驚喜。
 

原隻馬冀海膽，肉質肥厚，新鮮甜美

知道香港人鐘意食海膽，餐廳特別引入六款北海道海膽，包括尊貴原隻紫海膽同原隻馬冀海膽。選用日本北海道海膽係因為當地嘅水質優良，海膽自然比較香甜而唔帶苦澀味。

（由左至右）赤海膽、馬冀海膽、白海膽、鹽水海膽一樣嚟自日本北海道

唔同海膽各有特色，例如香港較為少見嘅白海膽口感唔太黏，味道比較清甜。赤海膽顏色比較深，口感軟腍味道帶少少甘。而港人最愛嘅馬冀海膽就最Creamy，味道亦最濃郁。另外鹽水海膽亦係唔少老饕嘅心頭好，貪其用海水保存，口感柔軟最接近原隻海膽嘅味道同風味。
 

Chris師傅介紹鮪魚唔同部位特色

鐘意日本鮪魚(Maguro)嘅朋友仔今次有口福喇，因為餐廳唔單止會供應日本鮪魚，而且仲會有平時相當少見嘅罕見部位。食到唔同鮮味之餘，又可以對鮪魚有更深入嘅認識。
 

鮪魚面頰（左）以及腦天（右）部分相當珍貴

例如腦天部分其實係魚頭頂部，由於一條鮪魚只有兩片，所以相當珍貴。呢個部位脂肪比較多，所以口感特別柔軟黏稠。而面頰就要用火槍燒出表面魚油，帶出香味，食落有彈性帶少少韌，最緊要嘅係完全唔覺得油膩！
 

鮪魚特別部位壽司，（由左至右）頸拖羅、腦天、面頰、筋拖羅口感各有不同

頸拖羅紋路呈網形，入口即溶。而筋拖羅位於大拖羅下面，師傅要先將筋位去除再輕炙表面，油潤誘人食落滿口脂香，口感亦相當柔滑！因為唔同部位各有特色，由師傅發辦安排品嘗次序，就唔怕會有食材相對失色嘅情況出現。
 

晚市Omakase Course

晚市有幾個唔同價位，例如$880嘅Omakase Course就包括前菜、時令酢物、壽司10貫、手卷1條、湯同甜品。
 

另有自家製特色單品（左）以及日本清酒供應，包括錦鯉清酒（右）

餐廳亦有唔少用咗南非鮑魚、意大利烏魚子等高級食材研發嘅單品，例如烏魚子流心海膽蝦丸、炸竹炭鮑魚配白松露醬同烏魚子木魚啫喱冷烏冬。值得一提嘅係餐廳有超過20款日本清酒，包括純米大吟釀、果實酒、燒酎等，更有季節限定酒例如靜岡縣嘅磯自慢，以配搭唔同海鮮帶出鮮味。
 

鮨豊
地址：天后琉璃街4號地下
電話：2566 3801
4月1日開始試業

文、相：Cathy