合味道杯麵同出前一丁，長期都係香港人嘅至愛，由細食到大都唔會食到厭。甚至去到日本旅行，都會有人鍾意加個去杯麵博物館嘅行程，整返個屬於自己嘅杯麵！不過，開飯仔要同大家講個好消息，以後唔使返鄉下都有得自己落手落腳整喇！

由今個星期三下晝3點開始，喺機場童夢城通識學園入面「我的合味道工作坊」同「出前一丁工作坊」就會正式開放喇，其中，出前一丁工作坊仲係全球第一間添呀，好威威豬呀！開飯仔有幸率先試整，都幾好玩！

DIY杯麵



1. 拎咗隻杯同落單紙之後，就可以發揮你嘅小宇宙，喺兩條金色線中間盡情畫畫畫，設計你嘅杯麵包裝
2. 最神聖嘅步驟，就係揀味喇！先喺海鮮味、香辣海鮮味、咖喱海鮮味同雞肉味之間揀定一個湯底，再喺12款配料度揀4款。平時食開嘅粟米呀蛋呀肉粒呀等等通通都有得揀，組合可以有成5400幾種。但開飯仔強烈建議大家一定要揀嘅一款係：芝士！出面冇㗎！你幾時食過杯杯麵有芝士先得㗎？
講多個貼士你聽，可以重複揀相同嘅配料㗎，即是話好似開飯仔咁整一杯4重芝士杯麵不是夢！
3. 將你畫好嘅杯同落單紙交畀店員，佢哋就會幫你加麵、湯底粉同配料、密封埋之後畀返你（全程都可以透過透明玻璃睇住）。
4. 最後就係將個杯麵拎去放入個充氣袋度，泵漲佢！完！

開飯仔DIY：4重芝士海鮮湯底杯麵

**成個過程其實好快，最耐應該就係你畫杯嗰part，一般預計半個鐘內都可以整好一杯

DIY即食麵

相比起杯麵，整即食麵嘅過程相對嘅功夫大啲，參與感大啲，好玩啲，但同時都係攰啲㗎科科，睇完你就知：

1. 搓麵粉同壓麵粉。
2. 用棍按壓麵團
3. 呢個就係最攰嘅步驟喇！將麵團放入麵機，攪動最少14次，初初好似幾輕鬆咁，愈攪就要愈多力水。
4. 麵團發酵、壓薄之後，就手動切麵喇！一樣都係攪攪攪！望住啲一條條孿嘅麵攪出嚟，係幾神奇。
5. 店員會幫你蒸麵、磅重同炸麵，最後入埋袋就大功告成！

**全程約90分鐘，需要2人一組進行

詳情
「我的合味道工作坊」&「出前一丁工作坊」
地址：香港國際機場二號客運大樓6樓童夢城通識學園
參加方法：網上及現場購買均可

「我的合味道工作坊」
價錢： $30
開放時間（星期一至五）： 11am – 6:30pm（每日15場）
開放時間（假日）：10am – 6:30pm（每日17場）
*逢星期三休息

「出前一丁工作坊」
價錢： $50
開放時間：11am – 6pm（每日3場）
*逢星期三休息

文：Kar
相：Cathy


其他新店介紹：
旺角掃街新勢力 10吋長串燒夠霸氣
韓風吹到嚟 浮誇鮮果沙冰店下月登陸 生果成座山咁高
美國人氣芝士蛋糕 The Cheesecake Factory香港第一分店 將登陸海港城


 

隨時接收最新資訊
讚好OpenRice專頁！