銅鑼灣今個月新開嘅一間餐廳就引入咗16部意大利嘅旋轉雪糕機，每部機整一種味，朱古力咖啡、泰式咖啡、士多啤梨、抹茶、開心果、檸檬薑味等等，仲可以搭埋焦糖爆谷等等嘅toppings添。每次都只係整2公斤，賣晒先再整。
睇住師傅將預先準備好嘅材料倒入部機度，撳掣，轉下轉下大約轉8-15分鐘就將本嚟液體狀嘅食材攪成軟身嘅雪糕，。開飯仔試咗抹茶、士多啤梨同開心果味，抹茶味係用京都抹茶粉調製㗎，所以食落都有一陣抹茶嘅甘香味！士多啤梨同其他果味嘅雪糕呢，就係用新鮮生果整嘅，好清甜；至於開心果味就仲開心，係將真‧開心果整碎後整㗎，如果鍾意食開心果味甜品嘅朋友仔一定好開心。而用呢部機整出嚟嘅gelato，比起平時嘅gelato更加軟滑，冇咁黏口。
呢間餐廳唔係淨得一球球意式旋轉雪糕食嘅，仲可以同埋其他中西食品嚟一個大cross over。雞蛋仔、窩夫、pancake、puff ……通通都可以夾埋雪糕一齊食。
另外，輕食都有。覺得食得太多雪糕同甜嘢好有罪惡感嘅話，叫返個凱撒沙律好似感覺健康啲，啲巴馬臣芝士薄片都幾大片㗎。而煙三文魚捲餅都一樣配咗唔少沙律菜喺側邊，捲餅餡就有煙三文魚、牛油果，同忌廉芝士，係match嘅。
詳情
Petite House
地址：銅鑼灣勿地臣街1號時代廣場3 樓Kiosk G
文：Kar
隨時接收最新資訊
讚好OpenRice專頁！