【新店直擊】東京築地海鮮丼専門店登陸油麻地　飛天鮪魚X海膽霸氣之選（有片）

都話咗今年係丼飯嘅世界！呢間由日本東京築地市場水産店創立嘅海鮮丼専門店，繼舊年喺灣仔開第一間海外分店後，今年初登陸油麻地。唔單止繼續有唔同招牌海鮮丼，油麻地店仲食到直送香港嘅原條日本飛天鮪魚，有啲丼飯款仲係得呢間先有，九龍新界嘅朋友仔唔使過海都有口福！

豊洲水産海鮮丼専門店油麻地分店佔地更大，等各位可以舒舒服服坐住慢慢嘆。全新嘅日本飛天鮪魚（Maguro）系列特別選用嚟自日本唔同產地嘅鮪魚，原條空運到港，咁就可以試到唔同刁鑽部位嘞。

飛天黑鮪丼有齊主角鮪魚腩同赤身、鮪魚腩蓉、鮑魚、三文魚子等等，赤身即係鮪魚嘅背部，色澤鮮紅，爽口有啲咬感；至於魚腩拖羅就好鮮滑肥美，入口即溶。而側邊嘅配料都值得介紹一下，有糖心蛋、青瓜粒、蘿蔔碎、同山芋等等，好豐富。

想再豐富啲嘅就有個有12款海鮮嘅特盛海鮮丼：比起飛天黑鮪丼再多咗帆立貝、北海道響螺、松葉蟹、醋鯖魚等等，醋鯖魚酸酸地又有啲韌度，幾特別㗎。

如果你想自由搭配嘅都得，可以選定一個丼飯之後再加料。有胃口又有quota嘅朋友，最多可以加晒13款料，夠晒霸氣！好似呢碗咁，喺謹製雲丹丼伴三文魚籽溫泉蛋（每日限量20客），即係海膽丼呀，on top再加晒所有料呢，就total係$866嘞，唔夠食想加飯都一樣得。