呢間日式燒肉餐廳，主打和牛燒肉，啲牛牛全部都喺日本原隻買入，所以基本上可以話你想食咩部位都有得食，好似肉眼、上肋肉、上肩肉、上肩胛、牛背、腹協肉等等都有得食。而啲牛牛暫時主要係嚟自日本四個地區，包括沖繩、宮崎、鹿兒島同北海道，稍為識少少日本地理嘅一睇就知道包晒日本最南同最北嘅地方嘞，每個地方啲牛嘅牛味都有分別㗎。
宮崎暖男牛嘅肉味相對上嚟講係淡少少，但係佢嘅脂肪分佈比例就比較平均，食落口仲有入口即溶嘅感覺，連個心都溶埋呀，唔怪得叫暖男啦。
北海道Cool魔男神牛喺比較凍嘅地方長大，運動量充足，所以佢哋嘅肉質亦都比較結實，食落都唔會話覺得成口肥膏。
而沖繩Motobu陽光男神牛嘅肉味就最重，高脂肪比例亦令佢嘅肉質鬆軟。
貪心仔想食晒幾款牛嘅真係可以why not three！佢哋有個「黑毛和牛燒肉拼盤」，每款牛有兩件，師傅建議由最頂層開始食起，肉味由淡到濃，咁就可以食得出晒每款牛嘅精髓同味道喇。鍾意嘅仲可以配埋沙律菜一齊食，又係另一種感覺，啲沙律菜係芥末沙律菜嚟，有少少辣㗎留意返，但夾埋和牛食又唔會搶咗啲牛味，係fresh嘅。
除咗牛之外，呢度仲有海鮮、飯糰、同其他前菜食。講下個蕃茄果凍，蕃茄一開四，浸埋啲蘋果醋同果汁度，酸酸地澀澀地，作為前菜嚟講的確幾開胃。另一個前菜，就咁望以為係雪糕，但又唔會溶嘅？原來係薯蓉沙律嚟，不過裝咗落個甜筒度啫。放埋一齊又幾夾喎，脆卜卜，不過自私食晒成個cone就會有啲飽喇，仲要留肚食牛㗎……食到最後，如果你個胃仲有位，就可以叫埋個甜品喇，雪糕雕魚燒，用中火輕輕烘一烘個面，微溫之中帶脆，中間嘅雪糕（紅豆或者曲奇味）又涼浸浸，好滾動！
BTW，好多人都鍾意食燒肉，不過又驚自己廚藝未夠，掌握唔到個火喉，每款牛肉又唔知燒幾耐，等待嘥咗就唔好（至少我係咁諗）。喺度食就唔使驚喇，因為大部分時間都會有員工幫你燒埋㗎，你又可以一路食，一路同佢哋傾下偈，認識多啲嘛，我指認識啲牛牛嘅知識呀。再BTW，lunch想食又冇咁多時間慢慢燒，喺「立食零售區」嗌外賣走都得。
餐廳資料：
萌
地址：觀塘駿業街56號中海日升中心1樓A號舖
文：Kar
隨時接收最新資訊
讚好OpenRice專頁！
關鍵字
觀塘
北海道
宮崎
日式燒肉
和牛
複製到剪貼簿