香港人鐘意打邊爐是常識吧，香港有唔少特色火鍋店，但講到「肉麻式服務」，內地嘅海底撈認第二，香港應該無一間敢認第一！而且佢地嘅川式火鍋湯底亦相當出名。最近開飯仔收到消息，佢地有望年中嚟油麻地開香港第一間分店，以後唔洗北上都嘆到喇！
 

川式火鍋連鎖店海底撈而家喺內地已經有168間分店，係最高人氣嘅麻辣火鍋店之一。而且佢地喺其他地方，好似新加坡、台灣、美國、南韓同日本都有分店。
 

佢地最大嘅特色係「肉麻式服務」，有幾肉麻？首先喺等位嘅時候就已經可以享受飲茶、美甲甚至係擦鞋嘅服務！如果係一家大細同小朋友一齊去打邊爐嘅話，仲可以帶小朋友去Kids Corner，由職員幫手照顧。
 

佢地嘅火鍋當然都係賣點，湯底有麻辣、三鮮、蕃茄、菇類等選擇，當中以清油麻辣同麻辣香鍋最受歡迎，香味濃郁麻而不辣。
 

而配料就有香港人食開嘅肥牛、丸類、蔬菜，同比較少見嘅羊肉卷、鴨舌、鴨血等。鐘意睇表演嘅記得要嗌撈麵，因為會有師傅出嚟即席表演拉麵！
 

雖然以上「肉麻式服務」、湯底同配料暫時只供參考，因為香港分店仲未有其他消息。不過海底撈嘅內地同海外分店口碑都唔錯，鐘意打邊爐嘅朋友仔不妨期待一下。
 

資料來源：蘋果日報
圖：Haidilao Singapore，海底撈火鍋台灣
文：Cathy
 

開飯編輯推介：

1. 【專訪】日本人在香港 開餐廳最重要健康行先

2. 1月份好評餐廳十強

3. 2017年港澳版米芝蓮指南

熱門文章推介：

1. 【一個人開飯】一個人喺大埔食乜好？

2. 【熟食中心尋寶】石湖墟街市熟食中心

3. 【開飯教煮】網上人氣甜品店師傅示範朱古力慕斯

隨時接收最新資訊
讚好OpenRice專頁！