連續幾日氣溫超過30℃，行街經過便利店唔買支雪條食都對唔住自己啦。抹茶風繼續大熱，連帶多咗唔少新嘅綠茶或者抹茶嘅雪糕雪條，開飯仔繼上次幫大家試新嘢之後，繼續冒住增磅嘅危險，幫大家試埋各款綠茶雪糕雪條。邊款茶味最香濃？邊款啱甜魔？睇報告啦！

井村屋黃金雪條 - 宇治抹茶

硬身宇治金時抹茶雪條包住北海道十勝紅豆，雪條咬落先食到少少甜味，但抹茶回甘度非常高，食得出真材實料。入面有紅豆粒粒同紅豆蓉，甜度唔高唔會搶咗抹茶味，仲增加咗口感味道層次。

價錢：$16.9
茶味：*****
甜度：**
吸引度：*****

井村屋紅豆白玉雪糕餅 - 綠茶味

包裝張相就非常吸引，雖然打開就見唔到啲餡，但食落最中餅、白玉、紅豆蓉同抹茶雪糕喺哂度。花型嘅最中餅無淋到，而且紅豆同抹茶雪糕比例啱啱好，甜得嚟又食到茶味。唯一美中不足嘅係白玉雪凍咗所以唔夠煙韌。

價錢：$15.9
茶味：****
甜度：***
吸引度：****

十勝紅豆雪餅 - 宇治抹茶味

平時抹茶配紅豆嘅話，都會係抹茶皮加紅豆蓉做餡，今次調轉用紅豆蓉做皮！最外面有一層十勝紅豆，甜甜地而且夠實唔會跌到周圍都係，中間係一層薄嘅糯米皮。最入面就係抹茶雪糕，雪糕有抹茶香，回甘度亦滿意，不過同紅豆一齊食味道稍微偏甜。

價錢：$13.9
茶味：***
甜度：****
吸引度：***

Häagen-Dazs S型脆皮雪糕批 - 綠茶杏仁

入面嘅綠茶雪糕相當出色，茶味香濃，如果回甘度可以再強啲就更好，勝在口感同哈根大師其他雪糕一樣夠軟滑。加上雪條脆皮用咗比利時朱古力加香口杏仁粒，咬落香脆並重，絕對加分。

價錢：$29.9
茶味：***
甜度：***
吸引度：****

雀巢Kit Kat綠茶味甜筒

Kit Kat今次食正抹茶熱出埋綠茶口味，新出品咁吸引當然要試埋。食落綠茶雪糕都有茶香，不過回甘味唔重。而且原條KitKat朱古力入面嘅威化餅脆脆地增加口感，如果中間條KitKat都係綠茶味就更爽啦！

價錢：$14.9
茶味：**
甜度：****
吸引度：***

久保田宇治抹茶紅豆牛奶雪條

雖然話紅豆係抹茶嘅好拍檔，但今次呢條雪條就出現「如果太多紅豆味～抹茶味就無掟企~」嘅情況，一咬落去紅豆味太出，要食多陣先嗒到抹茶嘅甘味。如果當佢係紅豆雪條呢就及格有餘嘅，但抹茶控就可能要失望啦。

價錢：$15.9
茶味：*
甜度：***
吸引度：**

（此文會不定期更新）