小丸子唔單止係唔少八九十後嘅集體回憶，呢個星期開始仲會化身唔同主題嚟到大家身邊！小丸子主題Cafe終於登陸香港，而且一開就有三間分店，仲要每間都有唔同主題。例如觀塘呢間當中小丸子就同各位同學化身萌爆貓咪，現身喺抹茶咖喱飯等主題食物上面！
今次小丸子 x Izumi Curry主題Cafe有觀塘apm、尖沙咀Mira Mall，同葵芳新都會三間分店。當中就以觀塘呢間率先開幕同各位Fans見面。餐廳周圍都搵到小丸子同小玉、花輪、野口等同學仔一齊變成唔同品種貓咪嘅蹤影，連櫈仔上面都有貓掌圖案。
嚟得主題Cafe當然唔可以剩係打卡咁簡單，打開Menu一睇，食物選擇以咖喱為主。當然最特別嘅就要數到呢個抹茶咖喱飯，睇落以為係青咖喱，其實係加入咗小丸子出生地日本靜岡縣嘅抹茶！一上枱熱嘅時候聞到陣陣抹茶香，等開飯仔仲非常期待。不過食嘅時候抹茶味就離奇消失，變返普通日式咖喱味，不過不失不過起碼唔係伏嚟嘅。
咖喱飯仲有奄列吉列豬扒咖喱飯，同芝士漢堡扒咖喱飯呢兩個選擇，特別係芝士漢堡扒仲要係貓掌造型，記得相機先食。呢三款嘅飯都可以揀人物造型，包括小丸子、小玉、花輪同野口同學。
另外鐘意創新配搭嘅話，仲可以一試抹茶炒飯。相反想保險啲嘅話，滑蛋豬扒丼應該係你嘅選擇喇。主菜其他選擇仲有雞肉飯糰配關東煮、叉燒咖喱烏冬同天婦羅咖喱烏冬。
一班Friend嚟當然唔少得叫多兩份小食開心Share，大阪燒無論係味道定分量都符合期望，都算抵食。芝士竹輪天婦羅中間有邪惡芝士，雖然做唔到牽絲效果，不過都幾香口嘅。
另外仲有餃子雞翼、日式牛粒燒、章魚燒等非常有日式風格嘅小食，想試哂嘅話記得預先留肚啦。
飲品就有三款特飲：紅色嘅草莓特飲、綠色嘅薄荷特飲同藍色嘅多瑙河特飲，顏色夠哂Sharp。覺得特飲太整色整水嘅話亦有熱飲選擇，意大利泡沫咖啡、朱古力咖啡同奶泡抹茶都有得揀圖案，做Selfie道具一樣得。最後仲有曲奇蛋糕同貓掌雪糕芭菲杯兩款甜品。
自問係小丸子忠實Fans要跑齊三間分店集郵嘅話，就Mark低以下資料喇：
MarukoNyan Café by IZUMI CURRY (觀塘apm) (小丸子x貓貓主題)
IZUMI CURRY (尖沙咀Mira Mall) (小丸子一家x華麗歐陸風)
IZUMI CURRY (葵芳新都會) (小丸子3年4班烹飪課)
相：Kar
文、片：Cathy
開飯編輯推介：
1. 【專訪】有故事的Man 手紋母親心電圖 以上門私房菜延續愛
2. 11月份好評餐廳十強
熱門文章推介：
3. 精選芋圓甜品舖PK戰
隨時接收最新資訊
讚好OpenRice專頁！