【飲食潮流】尖沙咀新派火鍋店玩到酒火入鍋

呢個星期又凍返，一向都鐘意打邊爐嘅香港人就更加打正旗號約埋成班Friend去嘆火鍋。而尖沙咀新開嘅呢間火鍋店就以反傳統為主題，湯底玩酒火入鍋，配料有冰淇淋豆腐同七色墨魚丸，熟食方面小籠包同心太軟都有驚喜，你Wishlist嘅下一間火鍋店，會唔會就係呢間？

講明打邊爐，無爐無靚湯底就嘥氣啦。而呢度淨係招牌湯底都有六款，花多眼亂嘅話，不妨就點最好玩嘅酒火入鍋。外面四格分別係材料十足嘅蝦兵蟹將、灰色但相當香嘅墨汁海鮮湯、麻辣味道平衡嘅四川麻辣湯同香味層次分明嘅潮州沙嗲湯。美女老闆Vivien係潮州人，所有湯底都自己試過哂，非常有心思。

酒火入鍋嘅重點係中間嘅木瓜盅，就咁望就好清，但其實之後會加酒點火，成場氣氛立刻High哂！木瓜盅可以用嚟做湯底，或者唔放食材當燉湯咁飲亦得，得咗。

火鍋配料選擇都非常多，一開始食清少少，香芋冰淇淋豆腐係用豆腐、魚肉同芋頭打成蓉，倒模蒸完之後再雪凍，所以似蜂巢豆腐咁吸味但口感柔滑好多。而即炸手工紫菜響鈴卷夠香脆，記得唔好滾太耐。

打邊爐無肥牛就好似無咗個靈魂咁，好彩呢度有頂級安格斯牛頸脊同本地手切肥牛，肉味香濃。另外亦有日本頂級黑毛豬腩肉同蒙古涮羊片，食肉獸唔洗驚啦。

而呢個七星報喜就最吸睛，七粒唔同顏色嘅墨魚丸都係唔同口味，分別係墨汁、菠菜、紅菜頭、番茄、甘筍、南瓜同原味，顏色盡量用返食材嘅天然顏色，味道唔算好濃，想試清楚口味記得用清啲嘅湯底。

唔單止墨魚丸玩顏色，連小籠包都可以有唔同顏色。六色小籠包嘅皮係混入蔬菜汁或墨汁，裡面分別灌入黑松露、蟹粉、墨汁湯、龍蝦湯、藥膳同上湯，一籠就可以試哂咁多口味嘅多汁小籠包。

呢度叫得做酒鍋，當然唔單止有酒火咁簡單。首創嘅清酒炸彈其實係用清酒雪凍變冰球，加到湯底裡面增添酒香，放心酒味絕對唔嗆，不過就記得唔好加落麻辣或者沙嗲等重口味湯底，唔係就好難試得出酒香。如果真係覺得麻辣同沙嗲唔夠辣，加個麻辣炸彈就啱啦。

而且除咗湯底可以加酒，呢度仲有Cocktail可以飲，唔好睇佢淡粉紅咁Fancy，其實佢用咗四種酒包括清酒同柚子酒再加玫瑰同士多啤梨，酸甜平衡所以入口唔覺飲緊有酒精嘅飲品。

反傳統火鍋店唔單止有火鍋亦有蒸鍋，多款新鮮海鮮任揀。當然海鮮仲有好多種食法，刺身亦係其中一種，特上刺身盛合有三文魚、八爪魚、海膽同鮑魚等，特別係甜蝦夠大隻又夠鮮甜。亦有其他餐廳少見嘅A5鹿兒島和牛刺身，入口即溶。

無論食得幾飽，甜品係另一個胃吖嘛。之前獲得周柏豪喺IG大哂嘅綠茶心太軟，一挖就見到綠茶餡流出嚟，流心程度滿分。雖然茶香同其他甜品店嘅抹茶甜品無得比，但心太軟唔死甜，點雪糕食有冰火效果，收貨有餘啦。

雖然係長氣不過講埋呢句，酒鍋除咗有晚市亦有午市，麵鍋由唔同食材、麵底同配料配搭。例如呢款就係由花膠蝦餃搭中式拉麵同養顏湯底而成嘅美人湯麵鍋，OL們Lunch多個選擇可以去試啦。

隨時接收最新資訊
讚好OpenRice專頁！