巴黎鐵塔從來都係浪漫嘅代表之一，去唔到巴黎，又唔想過大海睇A貨，仲可以嚟尖沙咀呢間Cafe。事關佢地10月會推出呢個全新巴黎鐵塔主題Tea Set，鐵塔造型雙層架上擺滿精緻茶點，啱哂放上Instagram呃Like之餘，仲可以同朋友嚟個悠閒滋味嘅Tea Time。

鐵塔跟返法國國旗顏色，上面再有兩層花型透明架用嚟裝二人分嘅茶點，一上枱唔好講咁多，當然係要瘋狂Selfie一番先啦。

茶點以法式甜品為主，最啱各位鐘意甜品當正餐嘅甜姐兒。咁多精緻茶點唔知點開始？店主教路上層可以「由淺入深」，即係先食黃色嘅芒果熱情慕斯配芒果果醬，最後到深色嘅75%朱古力慕斯配榛子朱古力脆底。

芒果熱情慕斯配芒果果醬帶自然果酸，相當清新。而粉紅色嘅野草莓慕士配杏仁餅乾底一樣酸甜有致，士多啤梨果醬夠Refreshing，有喚醒味蕾嘅作用。

75%朱古力慕斯配榛子朱古力脆底名副其實，濃濃嘅可可香味慢慢融化喺口中，脆底亦唔會過甜搶走風頭。造型有少少似迷你版嘅Chocolate Dome，不過就略嫌淋面做得唔夠精緻。

中間可以食返件鹹點黑松露芝士撻，鹹甜交錯無咁容易覺得膩。芝士撻嘅撻底夠脆，裡面嘅芝士亦夠滑，淡淡奶香配合上面畫龍點睛嘅黑松露相得益彰。或者亦可以先食法式檸檬撻，以檸檬嘅酸香一洗味蕾。放喺頂嘅薄荷葉令檸檬撻有少少涼同澀嘅After Taste，非常討好。

自製泡芙配吉士醬嘅吉士醬柔滑有雲呢嗱香味，可惜可能因為影相擺得太耐，泡芙皮口感變得過實，要扣分。最後野生草莓果醬配馬卡龍質地非常酥軟，女孩子們記得小心啲拎起。

因為成個Tea Set以法式甜品為主，所以建議配返杯咖啡。呢杯玫瑰Latte順口得嚟，咖啡香同玫瑰香糅合更怡人，最重要嘅係有玫瑰花瓣點綴，又可以繼續自拍吖嘛。

White Button Cafe & Dessert呢個巴黎鐵塔Tea Set將會喺10月1號開始供應，同時摩天輪主題Tea Set亦會轉為以鹹點為主，例如黑松露蛋沙律、煙三文魚多士同芝士條等。約多兩個朋友一齊去，咁咪可以一次過試哂鐵塔同摩天輪兩個浪漫Tea Set，兼一齊呃Like囉。