【飲食潮流】放題嘅嘢，另類選擇：韓式年糕放題

日式放題就食得多，韓式放題你哋又食過未？正確嚟講係韓式年糕放題！

Photo by lucywu & Yan_PIG
咩話？年糕都有得放題？係呀，少年，類似火鍋放題咁啦，一樣有腸呀丸呀菜呀菇呀麵呀咁樣淥嘅，不過就以年糕為主囉，有成二三十款咁多㗎！當然唔少得仲有爐邊蛋啦，識食嘅一定係落埋芝士同粟米！

食年糕放題之前，首先你要……揀汁！有蔘雞湯汁啦、豚肉汁啦、即食麵湯汁啦、牛骨汁、炸醬汁啦、蕃茄汁啦同咖哩汁啦，鍾意食辣嘅就可以揀炒年糕汁，有3隻辣椒㗎。揀完汁就可以自行拎年糕嚟淥喇，嗰廿幾款咩形都有，直嘅圓嘅通心嘅星形嘅心形嘅定數字形嘅都有，當中仲有啲係紫薯年糕同芝心年糕添呀！長條形嘅比較軟身，圓粒嗰啲就幾有咬口，煙煙韌韌咁，淥嗰陣要多啲攪下個鍋喎，唔係就好易黐底㗎喇。

Photo by cat1030
仲有，記得留肚！記得留肚！記得留肚！（因為很重要所以要說3次。）因為最後仲有芝士炒飯可以炒呀留意返。食到咁上下，可以出去拎啲飯糰，溝埋紫菜碎、粟米粒同芝士一齊嚟炒，正呀喂！不過，記住唔好做眼闊肚窄大嘥鬼，真係食得晒先好拎返嚟呀！

文：Kar

隨時接收最新資訊
讚好OpenRice專頁！