CC炒雪糕
呢檔炒雪糕原本喺長洲做開嘅，而家就搬咗嚟旺中。每款炒雪糕都可以揀一種生果或者配料，再混入黏身啲嘅土耳其雪糕度一齊炒，最後淋醬、加toppings，鍾意嘅連埋脆脆地嘅窩夫一杯上，接近30蚊杯。生果有士多啤梨、蜜瓜、蜜桃等等，都係喺果欄新鮮買入嘅，而雪糕呢就有云呢嗱、綠茶或者豆腐花味揀。
不得不提嘅係招牌榴槤雪糕，用泰國金枕頭整㗎，開飯仔仲睇住老闆娘新鮮切好，老闆就拎一嚿去炒喇，炒出嚟食落仲食到啖啖榴槤肉㗎。如果真係鍾意食榴彈嘅朋友，就建議揀淡味少少嘅云呢嗱雪糕配返，仲可以揀特濃榴槤，老闆會畀嚿大嚿啲嘅、或者加多一嚿落去炒㗎！
手卷駅
唔知呢期是咪興食海膽手卷呢？葵廣開咗好多間，旺中呢度都有一兩間啊，其中一間就喺2樓呢個「小食店陣」度。42蚊條海膽手卷，用嘅係大連馬糞海膽（遲下會用紫海膽喎負責人話），海膽嘅量都算幾多，成條橙色咁見到係幾興奮。即叫即整，食落未至於有苦味，但就唔算話十分之甜啦。舖頭另外仲有其他手卷、卷物同埋日本小食，好似南瓜卷、紫芋薯餅等等呀咁。
又一戟
行開葵廣嘅都一定識得呢間主打班戟嘅食店，無論係店面定係班戟嘅種類，都同葵廣差唔多。熱嘅凍嘅鹹嘅甜嘅都有，廿零蚊一款，凍食加埋雪糕同生果喺面，捲到長筒形咁有啲似食緊超長甜筒嘅感覺。生果種類都幾夏日，有奇異果、蜜桃、士多啤梨、芒果等等。
Modos
圖（右）：ktsang1018 金沙糖
除咗小食店，其實仲有兩間賣嘢飲嘅，呢間就係其中一間嘞。主要嘅飲品都係以鮮果製，例如鮮榨果汁、果汁綠茶、果汁乳酸、果汁冰沙等等，仲有涼粉生果杯添，一杯可以有4款生果㗎。而夏日首推嘅一定係西瓜椰果，8蚊杯，將新鮮西瓜切好再放入攪拌機，即叫即攪，然後再放埋椰果，係甜嘅，不過係西瓜嘅果甜味，而家咁熱飲都真係幾解渴。
清玉好茶
另一間賣嘢飲嘅就係都有幾間分店嘅清玉好茶，奶茶、tea latte、果茶等等都有得飲，而最新推出嘅就係檸檬青茶同冬瓜青茶。冬瓜消暑嘛，就試下杯冬瓜清茶，攪拌完之後面頭有層泡沫，飲落就堅係清爽，茶味突出之餘又唔會蓋過咗冬瓜嘅清甜。所有飲品都可以自選冰同糖嘅比例，咁就唔怕會太凍或者太甜喇。
其實除咗呢啲主要集中喺2樓最篤篤嘅角落嘅小食店之外，細行成幢旺中，喺1樓同3樓都一樣會發現到有其他散落喺時裝店同精品店中間嘅小食店㗎，例如3樓就有好似乜都有得食嘅YO+ snack shop同10蚊3球雪糕嘅ice queen，而1樓就有長洲糯米糍芒糍糍同築卷。
圖：（左上）譚美美 、（右上）KIN YAN文：Kar
隨時接收最新資訊
讚好OpenRice專頁！