「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下深水埗。

台灣米苔目   軟橋米苔目餐廳

圖：藝術家、Pocaguri

成日都話自己食，都可以食好啲，呢間台灣嘢幾唔錯，係牛肉麵同滷肉飯以外嘅選擇。食米苔目嘅。即係啲類似銀針粉嘅粉，但比銀針粉再幼細啲、腍身啲，米味幾香嘅。35蚊碗豬骨湯底兩餸麵，餸嘅選擇都係一般嗰啲豬肉、雞肉、牛肉、魚蛋、牛丸呀咁，但唔係肉粒而係肉片呀，感覺都幾抵食。唔喜歡豬骨湯嘅可以轉其他，方魚肉碎湯都唔錯，魚味鮮甜。

醬油老鼠粉   蘇媽.蘇媽馬來西亞美食店

圖：Sandyfloss、T.LAU914

呢間餐廳開喺後巷嘅，一個人嚟啱晒啦，平時邊有friend會同你嚟吖。但舖頭不可貌相，主打馬來西亞嘅特色嘢食，絕對可以彌補返佢位置上嘅先天不足。老鼠粉係呢度嘅招牌菜，落咗甜豉油同黑醬油，再撈埋啲豬肉、豬肉腸、蔥一齊食，幾有風味。又，如果怕肥膩嘅，一係叫椰漿飯。啲飯綠綠地色，甜甜地咁帶出微微嘅椰香，仲有啲鹹魚仔，送飯一流。

秘製辣汁車仔麵   文記車仔麵

圖：hutrice、mozone

喺呢個麻甩嘅區域，呢間車仔麵都算係冇咁麻甩嘅一間舖。裝修幾新淨同光猛，有時女仔就算要自己一個食，都入得過。平時都幾多人排隊等位㗎，一個人就應該易攝啲。無論係粉麵嘅種類，定配料嘅種類，都有唔少選擇。食牛嘅最好嗌牛，牛肚牛腩牛栢葉，全部都好香，配埋腩汁就更加perfect池，而如果食得辣嘅，不妨揀埋秘製辣汁，夠晒刺激。

黑松露蛋多士   良記餐廳(老鳳冰室)

圖：lamyeeeee、Fion Keung

一個人食飯嘅推介，點少得茶記？深水埗呢間冰室好多嘢食，傳統嘅蝦多士又有，新潮啲嘅黑松露蛋多士又有。前者嘅蝦膠又多又彈牙，後者隻蛋炒得好滑，仲有蛋汁添，連埋黑松露醬食，係色香味俱全。另外，邊個話一個人就唔可以叫個牛油果軟殼蟹竹炭漢堡？原隻軟殻蟹上㗎，霸氣。記得叫埋冰鎮奶茶喎，啲冰係奶茶冰嚟呀。

抵食牛肉漢堡   添福小食

圖：Duckduckchic、豬屎忽

對於嗰啲好怕一個人坐低食嘢嘅人嚟講，呢間就啱晒。全部行街嘅，冇得你坐。而且一個黑椒牛肉漢堡都係十幾蚊咋，手打牛肉喎，厚切喎，即叫即煎喎，係幾抵。唔食牛嘅可以食雞，千島醬雞扒包都唔錯，啲肉幾滑。個包就幾鬆軟，怕唔夠飽嘅叫多包薯條就得。

文：Kar