講起中國茶，大家嘅第一印象可能係坐定定睇茶藝師用紫砂茶壺沖茶，但其實佢仲有好多唔同可能性！中環最近新開咗一間專賣手工花茶嘅飲品店，唔單止以紅鶴同森林做裝修主題夠多影相位，而且有多款茶飲選擇配搭，充滿新鮮感！
 

Flamingo Bloom主打時尚中國茶，全部茶飲即叫即製，而且有四款茶底：福建毛尖苿莉綠茶、台灣高山油切烏龍茶、雲南胎菊普洱同四川蝶蘭紅茶選擇。揀完茶底可以再按自己喜好加水果、珍珠、芝士奶蓋等。
 

（左）珍珠鮮奶蝶蘭、（右）多果油切烏龍

各款茶底各有唔同特色，例如台灣高山油切烏龍茶裡面嘅茶多酚就有避免人體吸收過多油分嘅功效，所以建議配搭新鮮雜果，包括西瓜、青檸、蘋果、熱情果等等，感覺更健康。而且水果係店方每日直接去果欄入貨，保證新鮮。
 

珍珠鮮奶蝶蘭

而四川蝶蘭紅茶喺坊間比較少見，飲落味道帶少少焦糖同花香。所以呢杯珍珠鮮奶蝶蘭非常容易入口，店方特別喺鮮奶當中加入Super Food紅菜頭汁，賣相粉嫩。珍珠亦係自家熬煮，口感煙韌富焦糖香。
 

 

奶蓋胎菊普洱

嚟自雲南西雙版納嘅胎菊普洱係經過發酵嘅紅茶，茶湯褐紅有濃郁回甘。配搭店方自家特製嘅鹹芝士奶蓋更相得益彰，少少鹹香帶出芝士嘅牛奶甜味，口感亦會更加柔滑厚潤。
 

草莓茉莉綠茶

店家連茶嘅炒製方法都有要求，例如佢地嘅毛尖苿莉綠茶係特別請茶園加入比平時更多嘅茉莉花瓣，因此茶湯飲落除咗有綠茶嘅清爽回甘，更多咗一份茉莉甜香。建議配搭唔同水果、例如士多啤梨、芒果或者藍莓，店家會以足100g嘅水果先打碎再加入茶湯手搖，飲到粒粒果肉同時唔會搶走茶香。
 

茶飲可以選擇熱或凍飲，正常糖份、少糖或者無糖，素食者亦可以選擇以杏仁奶代替牛奶。而且店家唔用任何人造色素或者香精等添加劑，呢個夏天嚟飲多幾杯消暑茶飲都毫無罪惡感！

最後唔好話開飯仔唔益大家，新店有開張優惠，即日起至7月20號，Happy Hour (16:00-20:00) 時段只要出示Facebook Like & Share，或者Instagram Follow & Tag就有買一送一優惠啦。 

Flamingo Bloom 小紅鶴
中環士丹利街50號信誠廣場地下B室

文、相、片：Cathy