成日都聽到啲人話，好葡萄人哋隔籬國家嘅便利店，有好多好嘢食，一陣間又布甸麵包，一陣間又tsum tsum咖啡咁。其實香港嘅便利店都一樣有寶㗎！就等開飯仔同大家一齊去尋寶啦！

期間限定日本直送    Haagen Dazs

每次去日本都必定要搵嚟食嘅日本期間限定味，有6款嚟咗香港呀！上次就同大家試咗抹茶同士多啤梨芝士味脆皮雪糕三明治，今次再一次過試晒紅桑子吉士味雪糕三文治同埋3杯迷你雪糕杯：咖啡雲呢嗱、冧酒提子、雲呢嗱曲奇紅桑子。

紅桑子吉士脆皮雪糕批一拎上手已經好少女，粉紅系嘅紅桑子朱古力脆皮，包住奶香味濃嘅吉士雪糕，都未夠，中間仲要有甜甜地嘅紅桑子醬靜雞雞咁唧出嚟！OMG！點忍？

至於啲迷你杯，雲呢嗱曲奇紅桑子就甜甜酸酸咁啦，冧酒提子冰凍甜點嗰隻嘅冧酒味都幾濃郁下，咖啡雲呢嗱冰凍甜點呢，微甜之中又有陣陣香香地又澀澀地嘅咖啡味，係三款迷你杯中最突出嘅一杯。

Recap返抹茶味，無論係面頭嘅脆餅、脆皮定係雪糕，通通都係抹茶，超香濃呀，仲有微甘添！

價錢：$39
推介度：*****

金進乳酪雪條

估唔到韓國嘅益力多熱潮都吹到過嚟香港，之前最多都係見到一包包嘅唧唧冰同埋一大包嘅薯片之嘛，而家竟然見埋一條條嘅雪條呀！拆開之後係有少少失望嘅，因為都幾細條下，而且食落益力多味唔出，但乳酸味重嘅，唔太甜都還可以。

價錢：$14（7-11）
推介度：**

樂天brownie雪條

呢款brownie雪條，包裝袋上面大大隻字寫住「真‧Brownie」，拆開係一條兩截色嘅雪條，上面係朱古力，雪條軟身，朱古力味係幾濃嘅，而下面就係曲奇忌廉味，仔細睇會見到暗藏咗一粒粒嘅brownie，但啲粒粒再大粒啲會開心啲。一次過食到兩隻味，啱晒貪心鬼。

價錢：$15（7-11）
推介度： ****

小老闆紫菜百力滋

呢隻小老闆紫菜百力滋出咗一段時間，不過之前係要靠去泰國嘅朋友買返嚟做手信先有得食，而家就唔使靠人lu~ 嗯，成條密密麻麻都見到啲紫菜粒嘅，咪即係紫菜味百力滋囉其實。但脆紫菜嘅口感，始終都係原裝正版一塊塊咁食先至最爽。

價錢：$9.9（7-11）
推介度：***

文：Kar
相：Kar、Cathy