好耐之前同大家介紹過元朗一間手調飲品店（重溫：連狗狗都飲得嘅混調花果茶）。經過大半年時間，呢間小店終於殺出新界，最近於中環旺區開咗第一間分店。純粹講鋪頭設計已非常搶眼，亦少有地為產品影咗好多精美宣傳照，可見老闆娘非常花心思經營，更加配合中環型格路線。

嚟到新區，當然要整啲新飲品吸引下新客，呢款中環限定「初戀伊豆」以日本直送的粉紅茶製作，最特別之處就係只要加入一小杯鮮檸檬汁後，茶就會漸變粉紅，而且會越變越深色，最迎咁流行變色飲品，呢杯啱晒呃Like。味道方面，一開頭會較酸，之後會慢慢變甜，帶有淡淡花香。補充一句，老闆娘話粉紅茶源於日本「花青素茶」嘅紅芽，咖啡因含量低，抗氧化物含量比綠茶高10倍，對抗衰老好有用架！

另外，大家都知呢排水蜜桃當造，老闆娘就推出咗期間限定嘅「夏日麼麼多」，用成3/4個水蜜桃（好似唔使錢咁）加益力多打成沙冰，味道清甜，飲得出新鮮水蜜桃汁，而且色澤白裡透紅都好吸晴。

不過呢，要試就快手，就嚟完水蜜桃季就唔做喇 T_T

同大家一樣，平時去啲連鎖飲品店都最鍾意飲抹茶，但茶味多數都係普普通通啦。呢杯靜岡真夏真係不得烏，抹茶味超濃，與牛奶混合非常Creamy，沙冰溶化都無點溝淡，最重要係有回甘，飲品嚟講係少有呢個效果。坊間通常都強調宇治抹茶，原來靜岡都有咁甘香嘅茶，老闆娘話幾個大日本抹茶品牌都係用呢隻抹茶粉，而重點係佢透露一杯飲品用多人哋3-4倍茶粉，想唔香濃都唔得啦！

除咗沙冰同花果茶，呢度嘅咖啡都可一試，佢哋用自家烘培嘅咖啡豆混合危地馬拉衣索比亞同巴西嘅高山豆，呢杯代代木咖啡就係從日本嗰邊開習配方，上面晒上抹茶粉，類似Green Tea Latte，但啡味偏重，口感幾Rich黏口。

中環店另一特色就係有幾款自家製食品（元朗店係冇的），幾款蛋糕用樽仔盛載，老闆娘解釋咁樣可以保持蛋糕濕度，亦方便攜帶。綠茶海棉蛋糕配石榴慕絲有三層，最高係蘋果金寶碎，甜甜地配微酸石榴慕絲幾夾，中間班蘭香滑，低屠綠茶海棉蛋糕鬆軟；芒果熱情果都係酸酸甜甜幾開胃；經典黑森林就要食中間自家研製嘅莓醬，相當獨特。

下次星期六日同狗仔港島遊可以嚟Chill下！