「黑超」炭燒雞蛋仔 大澳炭燒雞蛋仔叔叔
Photos by chongjacky & DollyLing
唔係講笑，入大澳唔搵呢位戴住黑超嘅超Cool伯伯買返底雞蛋仔，就好似無去過大澳咁。由以前嘅車仔檔到而家嘅舖頭仔，伯伯依然堅持用炭爐燒雞蛋仔，所以同出面平時食嘅有好大分別。炭爐雞蛋仔睇落金黃色，聞落仲有少少好似去BBQ咁嘅炭燒味。食落外面好似薯片咁又脆又薄，而雞蛋仔嘅部分就軟綿香甜，鐘意食蛋糕質地雞蛋仔嘅就啱哂。
即炸無得輸鬆軟沙翁 大澳餅店
Photos by olfooddiary & eat_eat_everyday
覺得平時食嘅沙翁好油膩或者太甜？嚟大澳呢間餅店買個新鮮即炸嘅沙翁或者會令你改觀。老闆娘用心機慢慢將麵糊炸到脹卜卜，再逐一裹上砂糖，全部手工作業所以人多嘅時候一樣要排隊。但暖笠笠嘅沙翁咬落外脆內軟，充滿蛋香而唔過甜，輕盈但唔係全部都係空氣。最抵讃嘅係一啲都唔油膩，睇個紙袋唔會變到油淋淋就知道啦。
香氣四溢香妃卷 大澳小食
Photos by 蒙奇奇
恕開飯仔孤陋寡聞，之前真係未聽過香妃卷呢個名，但嚟到大澳就變成必食小食推介之一。香妃卷洋名Chinese Pizza，老闆先喺燒熱咗嘅鐵板上加粉漿，推成大薄餅之後再掃一層蛋汁後，再加入蔥粒、芫荽碎、菜甫、芝麻、蛋散同燒汁。一咬落去，果然立刻香氣四溢，而且材料唔單止種類多數量亦多，味道口感層次豐富，雖然餅皮軟咗少少，但無損美味。
軟糯茶果糯米糍 茶果財
Photos by eat_eat_everyday
大澳有兩間小店嘅茶果都相當出色，不過為咗照顧埋甜品胃唔細嘅女士們，就介紹呢間賣埋糯米糍嘅。鹹嘅眉豆鹹茶果、甜嘅豆沙茶果、花生茶果，加埋花生糯米糍同豆沙糯米糍，就咁多選擇。貴精不貴多，茶果餡同皮嘅比例適中，皮軟熟唔黏而餡亦夠多。而糯米糍亦粒粒飽滿雪白，皮比茶果嘅煙韌而依然軟腍。人手包嘅茶果糯米糍供應有限，大概三點賣哂就無！
停一停嘗陰陽 車站豆腐花
Photos by Nana 6一6 & au9
周圍行完或者排隊排到有少少攰，可以嚟呢間小店稍作休息。店如其名主要賣豆腐花，而最出名嘅就係一黑一白貌似太極陰陽圖嘅豆腐花拼芝麻糊。豆腐花有微微嘅豆香，配埋濃郁嘅芝麻糊食味道就啱啱好。雖然論豆腐花嚟講，算唔上香港數一數二咁好食，但夏天嚟返碗微甜冰涼嘅豆腐花，成個人都立刻精神返。
彈牙黑白墨魚餅 旭日
Photos by eat_eat_everyday & HinKiFoodie
去到離島，同海鮮有關嘅小食特別多，而今次呢間小食店最多人食嘅，就係一串串嘅墨魚餅，一串兩件，一黑一白，同樣彈牙而且有唔少墨魚粒。唔同嘅係黑色嘅加咗墨汁，有墨汁香味之餘口感較實，白色嘅墨魚餅就軟少少。小食店仲有其他秘製醬汁小食，有時間嘅可以坐低食碟秘製雞翼尖，微辣惹味。
超厚肉鹵水墨魚 復興行
Photos by babyfooddoc & LewisNg7551
食完墨魚餅覺得唔夠喉？咁鹵水大墨魚點睇？呢間小食店嘅鹵水大墨魚出名夠厚肉，咬落彈牙又唔韌。滷水汁比較淡，香料香味夠而唔過鹹，所以唔會蓋過墨魚香味。稍微可惜嘅係提供嘅醬料唔多，鐘意重口味嘅朋友唯有點多少少辣油啦。另外亦有大大粒魚蛋，彈牙得嚟又有咖喱香，雖然少咗魚肉味，仍不失為掃街小食嘅選擇之一。
惹味香口蝦豬餅 張財記蝦醬
Photos by kamikoliu & conniecheung
不得不讃一下呢間賣蝦醬小店嘅營銷手法，將自家制蝦醬整成小食，股香味將客人吸引過嚟，試完覺得好食就可以即刻買蝦醬返屋企自己整。言歸正傳，呢款小食就係蝦豬餅，用蝦醬炒豬肉碎，加生菜再用煎過嘅酥餅捲起。豬肉餡香味十足，而蝦醬有提鮮作用而味道唔會太鹹。而生菜就中和返個油膩感。要注意嘅係酥餅有時候會油膩咗少少，但勝在只此一家。
足料解渴羅漢果茶 大澳仁興和記羅漢果茶
Photos by 亞瑜(AYU)
食咗咁多惹味小食，口渴嘅話不妨嚟呢度買返支羅漢果茶。唔鐘意羅漢果？Sorry咁請君稍移玉步去其他地方啦，因為呢度獨沽一味只賣天然原味，無添加嘅羅漢果茶。因為無加糖嘅關係，味道會較甘，而且夠足料，所以味道亦較濃。如果唔慣嘅朋友仔可能會覺得似涼茶有啲難入口，不過鐘意嘅就會覺得甘甜清潤。
無冰濃縮凍檸茶 其記
Photos by Lawrence Lau
事先聲明，呢間冰室的確唔可以算係正常掃街嘅目標，但如果覺得口渴，唔想飲羅漢果茶又唔介意入冰室坐一陣嘅話，呢度嘅凍檸茶就係開飯仔嘅推介。送上嚟嘅時候唔好驚訝，就係咁細杯，因為師傅已經先搾好檸檬汁，加少少糖漿混入紅茶當中再雪凍，即係話呢杯無冰無檸檬嘅凍檸茶，可以盡情飲哂成杯！味道濃郁到好似凍檸茶嘅espresso版咁。
隨時接收最新資訊
讚好OpenRice專頁！