去台灣多嘢食就梗㗎啦，但嘢飲方面，好似不外乎都係珍珠奶茶呀、冬瓜茶呀，或者最近好興嘅變色蝶豆花之類，不過今次想介紹下台灣啲啤酒。特別係平時都鍾意飲返一兩杯嘅朋友仔，去旅行就梗係要試下當地特色嘅啤酒啦。今次就同大家介紹一下呢間金色三麥。
蜂蜜啤酒
一聽個名就知呢隻係甜甜der啤酒啦，女仔一定鍾意。一般嘅蜂蜜啤酒都係用柑橘花蜜造，而呢杯就係用一年得28日產期嘅台灣龍眼蜜釀造㗎，飲落更加清甜，亦唔會完全蓋過咗酒香，依然可以細味到淡淡嘅麥香。咁甜咁易入口，好容易就唔小心飲多咗兩杯，不過都唔使太緊張，酒精濃度都係5%㗎咋。作為餐前酒開下胃都係一個唔錯嘅選擇，配沙律、薯條都幾夾。
黑麥啤酒
呢隻帶有濃郁嘅朱古力同煙燻味嘅黑麥啤，麥香味重，比起蜂蜜啤酒嚟講當然就甘少少、苦少少，食完飯之後飲就最啱。
琥珀啤酒
叫做琥珀啤酒，係因為佢嘅顏色同琥珀好似。用大麥造嘅，甘甘甜甜嘅麥芽味令佢成為一隻都幾百搭嘅啤酒，一路食嘢一路飲都得。
小麥啤酒
至於呢隻小麥啤酒，麥香之中仲帶有少少果香味，入口清爽，建議可以配埋海鮮沙律同德國牛肉腸一齊食。
以上呢幾隻用各種麥子釀成嘅啤酒，全部都可以喺主打現釀啤酒嘅金色三麥度飲到，呢幾隻由佢哋研製嘅啤酒，仲曾經拎過唔同國際啤酒比賽嘅獎添。當然，呢間餐廳唔係淨係得酒飲嘅，都仲有好多佐酒小食或者主菜，而且，平晚仲會有駐場歌手唱live music添，喺旅程入面有一晚嘆下酒，聽下歌先至係relax呀。
涼拌墨魚：微辣，感覺清新
現釀啤酒蝦（兩款口味：乾燒就係將大蝦煎乾後再用啤酒調味，椒鹽就係加入蔥蒜、辣椒乾煎後先用啤酒調味）
超值大拼盤：認真大！有齊薯條、德國香腸、椒麻雞、德國豬腳，全部都好香口，送酒啱晒。
鮭魚卵什香拌飯：一咬就爆汁嘅三文魚子，連埋鮮烤鮭魚肉，好送得飯。
蜂蜜啤酒芒果冰沙：連甜品都加咗啤酒入去，夠晒爽！
差啲飲到唔記得講，呢度嘅環境真係大到不得了，成層商場咁大，設計具歐洲風情，而且間唔中會有Live Band表演，令你好似入咗另一個空間一樣，忘記煩惱，所以好多人都會選擇喺度求婚或者慶祝生日。而且旁邊係美麗華摩天輪，食完同未來老婆一齊坐就好完美好浪漫。想預早安排好，記住去台灣TableMap Book咗檯先喇！
文：Kar
隨時接收最新資訊
讚好OpenRice專頁！