如果講起米線就會諗起荃灣，咁講起車仔麵，你哋又會諗起邊度？會唔會係元朗？元朗呢個美食福地，都有好多間車仔麵檔仔呀！有啲仲已經做咗好多年，係街坊由細食到大嘅飯堂嚟添。食得車仔麵，就預咗舖頭裝修未必好靚好新，反而可能仲好殘，座位又可能好窄，但就係咁，先至係最地道嘅車仔麵！麻甩，但有風味嘛。
呢間係其中一間好受元朗街坊歡迎嘅車仔麵，位於元朗大橋街市附近。嚟得呢度嘅通常都係衝住佢嘅辣汁而嚟，因為真係堅辣，平時嘅大辣，可能只係等於呢度嘅小辣。不過車仔麵呢家嘢，係要辣辣地，食到標晒汗咁先夠地道。而且仲要叫啲索汁索辣嘅餸，例如蘿蔔、金錢肚、豆卜等等。不過呢間會錢就唔算平喇，坐底最少要叫3個餸，每個餸最平7蚊最貴14蚊左右。
喺元朗警署附近嘅永年，曾經係元朗人嘅飛佛。三餸一麵 35蚊，想咩都食到嘅就叫個58蚊嘅聚十寶，咁就豬腸、魚蛋、蘿蔔、豬紅、豬皮、雞翼、魷魚等等通通都包晒嘞，再加多杯紅豆奶茶冰添，留意，係紅豆奶茶冰而唔係紅豆冰呀，甜甜地茶香幾重。都仲唔夠飽嘅呢度仲有唔係周圍有得食嘅咖央多士，有鮮油、煉奶、班蘭三種味揀，椰香味濃。
_______________________________________________ |
呢間就喺元朗廣場巴士站嗰邊嘅，麵有三個size揀：細、大同加大，廿零蚊碗，就算加大都唔使30蚊，係幾抵食。唔好睇少一碗雜錦麵每款料得一兩粒/片咁，佢勝在真係夠多款，舖到成碗滿晒就嚟瀉咁滯。食得辣嘅一定要揀咖喱湯底，好香口，豬紅、冬菇、魚肉同雞翼尖等等全部都好入味，
呢間都好多年喇，又係好抵食嘅一間車仔麵，一碗連埋飲品都可以30蚊有找。腩汁湯底夠香濃好惹味，鍾意食辣嘅加埋佢秘製辣汁冇得輸。豬皮幾腍，豬腸亦都洗得幾乾淨，食落爽口，冇乜腥味，油麵彈牙索汁。
文：Kar
元朗仲有咩好食：
元朗抵食米線 68蚊15款餸兩個人都未必食得晒（有片）
「菇」軍作戰 7間食大啡菇大蘑菇的餐廳小店（有片）
元朗廚師發辦日本菜 冇得揀都係老闆？（有片）
隨時接收最新資訊
讚好OpenRice專頁！