中環大館呢間新店相當有趣，門口隔離有部粉紅色自動售賣機，裡面擺咗一支支玻璃樽花茶；舖頭睇落以為係普通花店，原來只係啱一半：因為仲可以坐低嘆即沖花茶同天然果乾！下次去大館影相嘅話，就多個Check Point啦。
 

Hahahaflorist由香港一位花藝師開設，中環新店唔單止有花，亦有精選花茶！茶葉主要從德國進口，而配搭嘅花果就嚟自世界各地。小店裡面擺齊六款花果茶葉，大家可以聞下香味同睇睇有咩材料，從而揀啱你嘅心水花茶。
 

荔枝花果茶（$38）

用花花玻璃樽裝嘅冷泡茶暫時只有六款口味，當中比較受女孩子喜愛嘅就係呢樽荔枝花果茶，用蘋果、荔枝、檸檬草、小豆蔻等冷泡。因為長時間浸泡蘋果會有酸味，所以冷泡茶當中特別加咗少少蜜糖，既增加甜味亦帶出多種花果香。
 

牡丹白茶（$38）

冷泡茶另一選擇就係牡丹白茶，顧名思義即係用牡丹花瓣配白茶，白茶嘅清淡回甘唔會蓋過牡丹溫和嘅香味，適合唔鍾意太甜，或者想試下清淡花茶嘅朋友。花藝師亦表示小店始終以花為主，所以花香味會比坊間一般飲到嘅花茶更重。
 

玫瑰可可巧克力黑茶（$38）

六款花茶都有提供熱飲，其中以熱帶加勒比同玫瑰可可巧克力黑茶呢兩款比較受歡迎。玫瑰可可巧克力黑茶當中有黑茶、粉紅玫瑰、可可豆同朱古力片。用熱水沖泡過後，可可同朱古力嘅香味相當突出，再加玫瑰嘅淡淡花香，天氣轉涼嘅時候飲就最啱！
 

而喺店裡面享用花茶，可以配返店家特別調製嘅天然果乾。果乾會有三款唔同選擇，不定期更換，呢期就有士多啤梨乾、芒果乾同山楂條。士多啤梨唔會太乾，好似食緊濃縮版嘅果肉咁。而芒果乾特別加入酸梅辣粉，帶出芒果嘅酸甜香味。最值得一讃嘅係糖分唔高，配花茶一流。
 

茶包（$20/包）

注意返喺店裡面享用熱茶需要自己沖熱水，如果飲完覺得唔錯想Encore，可以考慮買茶包返屋企自己沖。每個茶包都可以沖到一壺喔。
 

花店唔算好大，但特別劃出一張長枱畀大家坐低慢慢嘆茶，亦可以欣賞呢度嘅花藝作品。同時亦係花藝學堂，鍾意花又鍾意花茶嘅話不妨留意下！
 

Hahahaflorist
中環荷李活道10號大館10&13座G02舖

文、相：Cathy