甜品控福音呀喂！尖沙咀呢間café又再推出晚巿甜品放題啦！9點開始，$88任叫任食，有成10幾款選擇，係時候要開動你哋第二個胃啦~

新一輪嘅甜品放題，主要係有冬甩、鬆餅、果撻選擇，而上次放題最受歡迎嘅心太軟亦有得留低。

心太軟一切開，啲朱古力漿就湧流出嚟啦，甜度適中，配埋雲呢嗱雪糕食啱啱好，係會令人忍唔住想再encore多幾個嘅。

冬甩有4款，分別係經典口味、士多啤梨、三重朱古力夾心同果仁奶油夾心，同樣都係會配埋一球雪糕。後兩者仲內有玄機，中間都係朱古力醬嚟呀！自認係甜魔嘅就揀呢兩款啦。不過溫提一下，啲冬甩都有返咁上下大個啊。

Muffin都係有4款，全部夾心餡，包括有朱古力、鹽味焦糖、紅果同蘋果肉桂（口味視乎當日供應），細細粒，一啖就食晒，唔覺唔覺，應該食到好多粒。

至於果撻，有兩款熱食三款凍食，熱嘅有蘋果撻同Raspberry撻，凍嘅就有Raspberry蛋白撻、杏桃撻同士多啤梨撻。

如果自問係大食仔女嘅，應該幾抵食，佢88蚊仲要係唔使加一呀！想食嘅話記得要早啲打電話去卜定位啦。

香港郵意
地址：尖沙咀漆咸道南61-65號首都廣場2樓80-82號舖
供應期：即日 至 9月30日 （每晚9-11時）

文、相：Kar