繼續有台式小食進駐香港！今次係爆餡紅豆餅，唔單止有經典紅豆口味，仲有唔少創意配搭，例如台式珍珠奶茶、QQ口感嘅花生或者芝麻麻糬、原塊Oreo擺喺面嘅Oreo咖啡口味等。餅皮香脆而且價錢親民，最啱各位觀塘「扮工」一族買嚟醫口痕！
 

（照片由餐廳提供）

大伯紅豆餅位於觀塘嘅阿元來了附近，原來係阿元將以前喺台灣夜市開過嘅紅豆餅攤檔搬過嚟！叫得創意紅豆餅，當然就有唔少創新鹹甜口味任揀，另外仲有雞蛋糕選擇。
 

負責人指日式紅豆餅嘅餅皮會比較厚，而台式嘅會比較薄，而呢度就更加會烤成脆皮，所以趁熱食最好。不過開飯仔就試過放涼一陣食，發現餅皮口感會變Q彈啲，睇下大家鍾意咩口感啦。
 

經典奶油紅豆（$12）

經典紅豆口味當然唔少得，亦係唔少人第一次嚟會點嘅。綠色餅皮係加咗抹茶粉，一方面因為抹茶同紅豆夾，二嚟亦增加淡淡茶香。裡面嘅紅豆無煮爛，咬落有原粒紅豆口感，味道唔太甜，同奶油嘅牛奶甜香加埋就啱啱好。
 

珍珠奶茶（$13）

珍珠奶茶係新嘅創意配搭之一，以阿元來了嘅台式珍珠奶茶為藍本，用錫蘭紅茶製作奶茶餡，再加入QQ珍珠，爆餡加上珍珠好有視覺效果！奶茶餡嘅紅茶香味濃郁，而且珍珠煙韌有咬口，的確幾有台式風格。
 

奧利奧咖啡（$12）

另一人氣口味，燒餅皮嘅時候加入原塊Oreo餅乾，裡面係柔滑咖啡餡。咬落先有咖啡嘅醇香，再咬多兩啖Oreo嘅甜味就會平衡返咖啡嘅微苦，整體比較香濃。
 

 

芝麻麻糬（$12）

鍾意QQ口感嘅朋友仲可以試呢款加入一粒粒白色麻糬嘅芝麻麻糬，芝麻餡滑得嚟都幾有芝麻香，而麻糬就口感Q彈，記得趁熱食會比較煙韌呀。
 

蘿蔔絲（$12）

除咗甜食，其實仲可以係鹹食！蘿蔔絲係台灣比較受歡迎嘅配搭，當地會選用蘿蔔絲乾 ，嚟到香港就改用新鮮蘿蔔，配搭蝦米同香菇。有啲似蘿蔔絲餅。一絲絲口感都幾特別，餡料香就夠香啦，略嫌味道比較鹹。
 

雞蛋糕（$25/6顆）

雞蛋糕用嘅粉漿同紅豆餅嘅麵粉比例唔同，食落口感會比較蓬鬆。呢度嘅雞蛋糕有三款口味：原味、巧克力、海苔。同台灣唔同嘅係呢度會加入卡士達，就係吉士醬餡。原味比較突出到吉士嘅甜味，朱古力味就再多一分甜香，海苔就帶少少鹹香比較特別。
 

大伯創意紅豆餅 by 阿元來了
地址：觀塘鴻圖道28號地下B號舖

文、相、片：Cathy