真·手打牛丸加陳年鹵水 成記牛什粉麵
圖：yatding
舊區特別多心機小店，例如呢間粉麵檔。雖然店名寫牛什，但手打牛丸更值得大家一試，食落唔單止富牛肉味仲相當彈牙，要注意佢唔係塑膠嗰種唔自然嘅彈牙，係扎實牛肉嘅自然有咬口。另外牛筋牛腩本身已經係靚貨，加上用陳年鹵水鹵過，牛羶味同鹵水香融為一體，無得輸。雖然有街坊話有少少退步，但仲堅持手打嘅心機加返分。
京蔥羊肉炒人手拉麵 手拉麵小廚
圖：leotse，J.A.M.
一樣係街坊飯堂，呢間賣京川滬菜，開飯仔最推薦嘅係京蔥羊肉炒拉麵，薄切嘅羊肉唔太羶，加京蔥洋蔥，同彈牙又爽口嘅手拉麵一齊炒，惹味香濃。如果唔鐘意羊肉嘅話亦可以點豬頸肉担担麵，担担麵湯底微辣帶花生香，手拉麵浸湯柔軟但一樣彈牙。
最後溫馨提示一句，有街坊留意到佢最近無開舖，希望小店係裝修，之後繼續有好味手拉麵供應啦。
平靚正多料火車炒飯 好運泰國美食
圖：gordonlee1234，yemenikwan
無飯不歡嘅，可以轉個場嚟呢間小店食餐平靚正泰國菜，火車炒飯個名聽完都可能唔知係咩，其實同西炒飯有啲似，用蕃茄、豬肉、洋蔥、蛋等配料炒飯。呢間嘅勝在夠足料之餘仲有鑊氣，飯粒粒分明又香口。另外佢地嘅咖喱質素唔錯，有青、紅、黃三款，青最辣而黃咖喱微辣。想食完全唔辣嘅，仲有泰式海南雞飯畀你揀。
米芝蓮懷舊撈麵+細蓉 英記美點小食
圖：rollingpanda
又一間傳統老店，亦係2016年車胎人美食推介之一。招牌菜係六十年代撈麵，其實即係懷舊嘅豉油豬油撈麵，豬油係自家鮮榨，香氣誘人，而且無油膩感令人忍唔住偶然邪惡一下。而細蓉者，細嘅雲吞麵是也。呢間老店嘅雲吞係金魚尾，餡嘅蝦肉比例較高，咬落清爽彈牙，配埋大地魚湯底鮮上加鮮。簡單平實但叫人滿足。
正宗豆花米線+蟲蟲？ 雲南人家風味餐廳
圖：piggy16，Kan Lee
呢間餐廳一如其名，以地道雲南家鄉風味掛帥，最多人嚟食德勝豆花米線，滑溜帶豆香嘅豆腐花，同昭通酱、酸菜、肉碎、米線原來咁夾！惹味得嚟口感豐富，加少少辣就一流。為咗照顧怕蟲嘅為食友，呢度無放蟲嘅相。不過大膽嘅朋友仔絕對要一試呢度嘅酥炸雜蟲，一嚟唔係咁多餐廳有得食，加上如果接受得到嘅話，香脆咸香嘅蟲其實有唔少蛋白質㗎。
港式手打漢堡包 賢友茶餐廳
圖：吉地魚
食厭咗美式快餐店嘅漢堡包，不如嚟呢間茶餐廳試下港式嘅手打漢堡包。漢堡包選用同樣富茶餐廳風味嘅脆身牛油豬仔包，皮脆內軟。手打漢堡扒雖然賣相有啲粗糙，不過食落厚度啱啱好仲要有肉汁，加埋生菜番茄同沙律醬，絕對唔會乾爭爭。配嘅薯條係粗身波浪紋薯條，有種港式豉油西餐嘅實而不華感。
即叫即整真材實料雞蛋仔 629雞蛋仔
圖：qoocly，oldboy008
如果係細食嘅女士或者Tea Time口痕，不如去呢度買底雞蛋仔當一餐。呢度嘅雞蛋仔係皮脆內軟，一半雞蛋糕一半空氣嘅口感。除咗原味，仲有期間限定特別口味，之前就係唔少Foodie都大愛嘅香芋，可惜而家因為唔當造已經無賣。下一輪將會係九月推出嘅紫薯或者栗子。而格仔餅就勝在厚身，醬料亦畀得疏爽，花生醬、煉奶、砂糖、牛油，簡單滿足。
平民米芝蓮港式糖水 華園甜品專家
圖：herbert，suet_lok
照顧埋甜品當正餐嘅一眾甜魔們，喺新蒲崗想食糖水，唔少街坊都會推介呢間獲得2016年車胎人美食推介嘅抵食中式甜品店。喳咋相當足料夠飽肚，紅豆、綠豆、芋頭、西米等粒粒好咬口，加上椰奶更顯香甜。 薑汁燉鮮奶嘅燉鮮奶相當香滑又富奶香，配唔太辣嘅薑汁仲有暖胃作用𠻹。想再貪心啲可以揀熱芝麻燉鮮奶，上層係香滑燉奶下層係幼滑芝麻糊。
隨時接收最新資訊
讚好OpenRice專頁！