愈嚟愈多日本梳乎厘班戟店過嚟香港開分店，最新一間有以芝士梳乎厘班戟為主打嘅Micasadeco & Café，各位pancake迷準備好去排隊未先？

新店選址朗豪坊，班戟分有兩款種類，一款係空氣感較重嘅梳乎厘班戟，另一款則係普通班戟。另外亦有多款鹹食同飲品供應。

招牌香軟ricotta芝士梳乎厘班戟以日本雞蛋、麵粉同牛奶製作，加入意大利ricotta芝士，配以100%北海道牛奶打發而成嘅忌廉，賣相簡約，但食落就知佢深藏不露。三層pancake一齊食嘅口感都相當鬆軟，空氣感適中，蛋香突出，而且層與層中間亦可清楚見到粒粒ricotta芝士，滲出微微鹹香。

抹茶梳乎厘班戟嘅配料同伴碟則相對豐富，有紅豆、甜薯、輕忌廉、蜜豆、抹茶醬同杏仁片，仲有金箔喺面添。班戟漿加入日本抹茶粉製作，色澤青綠，但抹茶味未有想像中突出，帶有淡淡嘅甘澀味。建議食嗰陣，搽埋碟上嘅抹茶醬一齊食，味道會較為香甜。

鹹食方面，明太子特製和丼定食行健康路線，糙米飯淋上以昆布、鰹魚熬製嘅高湯底，有淡淡嘅魚香。微辣鹹香嘅明太子，令呢道菜健康得嚟亦唔會太過清淡。

師傅更親自自家調製蕃茄醬同角煮汁，製作京都風香辣茄汁意大利粉，加入鯷魚、茄子、白飯魚等配料使之更為豐富。

 特製咖喱雞肉三文治

另外，餐廳亦有咖啡、日本茶等飲品選擇。Mocha有靚靚拉花，入口香濃朱古力味；日本焙茶 清爽香甜，帶有陣陣香烤味。

香港分店嘅廚師喺開度前曾到日本總店進行深造，務求令大家食到最貼近日本嘅原味道。暫時Menu都係跟返日本為主，香港限定或季節限定嘅款式就可能要再等多陣先有。餐廳暫定於9月20日開業，不過就不設訂座服務，想食嘅朋友仔，到時可能要預時間排長龍喇。頭300名顧客及隨後消費滿$200嘅話，都可獲贈香港別注限定版Tote bag（送完即止）！

Micasadeco & Cafe Hong Kong
地址：旺角亞皆老街8號朗豪坊B2樓B26-27號舖

文：Kar
相、片：Tom Li