屯門呢間新店主打手工意粉，新開無耐就成日Full Booking，原來係銅鑼灣人氣餐廳嘅分店！意粉有多款選擇，好似招牌紅蝦意粉，新出嘅和牛千層麵等等。其他食物一樣保持水準，甜品固然必食，連頭盤嘅麵包都引嚟唔少人買走㗎。
 

JEP by Involtini位於屯門，係獲得米芝蓮餐盤推介Involtini Italian Cuisine嘅姊妹店。JEP係指「Just Eat Pasta」，同樣由任職米芝連三星餐廳嘅廚師Jack主理，意粉選用意大利00麵粉、意大利蛋黃、Semolina小麥粉製作，新鮮製作口感特別煙韌彈牙。
 

酸種麵包、黑麥麵包（頭盤）

無論嚟食Lunch定Dinner，都會先奉上兩款自家製麵包作為頭盤。烘熱嘅麵包口感外脆內軟有嚼勁，酸種麵包會有輕微酸味，黑麥麵包就帶麥香。配搭自家製意大利黑醋牛油同橄欖油，黑醋嘅酸香溫醇，相當醒胃。
 

手造意大利短通麵，海鮮（Lunch Set $118）

鍾意食海鮮嘅朋友唔好錯過，唔單止有蜆、魷魚同紅蝦作為配料，醬汁更以海鮮汁同蜆汁製作，加上意大利短通麵帶坑紋可以沾上更多醬汁，入口鮮味滿瀉！海鮮都食得出夠新鮮，蜆肉飽滿，魷魚彈牙。
 

西西里小紅蝦，手造意大利幼麵（$310）

屯門新店亦有供應招牌紅蝦意粉，但將西班牙紅蝦換成西西里小紅蝦，肉質偏軟而且更為鮮甜。醬汁用上多款海鮮，包括魚、蝦、蟹、蜆等，西西里紅蝦蝦頭更先煎香再壓出蝦汁，蝦香非常濃郁！
 

六隻西西里小紅蝦煎香後，蝦頭香脆、蝦肉軟嫩。而手造幼麵同半風乾番茄都吸收晒海鮮嘅鮮甜精華，特別係幼麵口感偏硬身有嚼勁，每條都掛上醬汁，啖啖濃郁香味，令人印象深刻。
 

“黃”布和牛千層麵（$178）

睇落好似唔係好大份，但其實好有內涵！麵皮係一塊過，以「S」字形夾住澳洲和牛碎、意式白汁、水牛芝士，巴馬臣芝士再拎去焗，一上枱就聞到好香芝士香。
 

千層麵滑溜彈牙，肉醬帶鹹香同時唔會蓋過牛肉肉味，水牛芝士口感柔滑，巴馬臣芝士就增加鹹香，整體無論味道同口感層次都好豐富。
 

 

紅酒燴梨，自家製冰糕（單點$58，Lunch Set +$35）

甜品同樣出色，啤梨去皮，用紅酒、砵酒、橙皮燴煮，醬汁另上，配搭自家製榛子冰糕。因為冰糕比較易融，建議大家先試咗冰糕，再食紅酒燴梨，然後按自己口味淋上醬汁。
 

冰糕口感Creamy，當中有一粒粒榛子碎，甜度適中。紅酒燴梨軟腍入味，鍾意酒香嘅朋友可以淋多啲醬汁呀。
 

“自己整”提拉米蘇（$58）

可以畀各位大朋友同小朋友DIY嘅Tiramisu，將手指餅乾、濃縮咖啡抽出嚟，建議食法係食之前先將手指餅乾淋上濃縮咖啡，再加上用馬斯卡彭芝士製作嘅芝士蛋糊同可可粉。
 

好玩之餘，手指餅乾唔會因為浸得太耐而變得軟爛，亦可以隨自己喜好調整比例。
 

破曉（$68）

新推出嘅特飲之一，以蝶豆花同橙汁營造「破曉」顏色漸層，飲之前記得搞勻，味道清爽。
 

Violet bouquet（$48）

另一杯特飲以紫羅蘭為名，以士多啤梨、雜莓果蓉、檸檬汁、梳打調配，味道酸甜又有咬口。最後撒上可食用薰衣草，點綴同時增添花香。
 

半開放式廚房令客人可以欣賞菜式製作過程，餐廳環境舒適，稍後更會開放戶外座位

JEP by Involtini
地址：屯門良德街8號珀御地下G05號舖

文：Cathy
相、片：Tom Li