尖沙咀「口福街」最近又有間新店進駐，粉紅色店面好易認，連佢哋嘅雪糕都係淡粉色！原來小店專賣雪糕，而且盡量選用天然材料，好似自己浸玫瑰水整雪糕，配紐西蘭蜂巢或者日本蘋果醬，甜度適中唔會膩。
Talk 2 DeCream位於厚福街，幾位90後老闆希望可以為大家生活中提供一點甜，同時又想健康啲，所以雪糕都盡量選用天然材料製作，以蜂蜜或者水果嘅甜味為主，減少使用精製糖。
生蜂蜜玫瑰奶杯（$52）
招牌雪糕就係呢杯生蜂蜜玫瑰奶杯，雪糕用澳洲牛奶同自家製玫瑰水以秘方調配而成。一層層Oreo碎、玫瑰牛奶雪糕，最後再加紐西蘭蜂蜜、玫瑰花碎、Oreo同紐西蘭純天然蜂巢點綴。食起嚟蜂巢嘅清甜同玫瑰花香好夾。
另一亮點係雪糕中間都會有蜂蜜營造軟心效果！撈埋Oreo碎無論味道同口感層次都好豐富，唔會話食到一半都得返雪糕咁寡，食得出店主落嘅心機㗎。
肉桂蘋果樹（52）
以唔少女孩子都鍾意食嘅英式甜品Apple Crumble為靈感，裡面有一層層玫瑰牛奶雪糕、自家製日本蘋果果醬、消化餅碎、忌廉，最後灑上肉桂粉同插上風乾蘋果片。
聞起嚟肉桂香突出，加埋保留一粒粒果肉咬口而香甜嘅蘋果醬同餅碎，味道同口感都真係幾似Apple Crumble加雪糕！果醬用嘅日本蘋果會按季節挑選當造嘅品種。
更多【新店直擊】： |
金箔朱古力軟雪糕（$42）
小店另一款軟雪糕係朱古力口味，用86%黑朱古力製作，呢款更加灑上點點金箔，一定要把握時間相機食先啊！雪糕口感比較黏，朱古力香濃郁，味道唔會太甜所以自私食完一支都唔會膩。
開飯仔問過老闆，佢哋都話研究緊希望之後可以出更多唔同口味，例如以中式糖水為靈感，或者選用時令水果咁，值得期待！
【8折】Talk 2 Decream 特調天然雪糕 $50現金券
【8折】Talk 2 Decream 特調天然雪糕 $100現金券
Talk 2 DeCream 
地址：尖沙咀厚福街9號豪華閤地下A號舖
文、相、片：Cathy