雞蛋仔都算係香港最有代表性嘅街頭小食之一，繼早前流行雪糕雞蛋仔，及有雞蛋仔專門店打入米芝蓮，成功將呢種平民美食升呢。今次喺深水埗發現呢間港式小食店士叻哥，同樣以特色雞蛋仔作招徠，而且堅持即叫即製，更難得地保持親民價格，好值得幫襯！
士叻哥店主Alan本來唔係做飲食業，為支持家人開店，索性辭職主力開檔。小店雖小，但Alan都講求質素，做雞蛋仔嘅蛋漿比例、溫度及食材等反覆試過多次，棄北京、湖北蛋而選用泰國雞蛋，蛋味香而有質感。
現時有七款口味， 每底只售$15，亦可以自由雙拼。最受歡迎嘅味道係鹹蛋黃，非常足料，每啖都有甘香蛋黃，仲食得出起沙質感。另外香蕉朱古力用新鮮香蕉粒加黑朱古力碎製成，並非用香精糖漿或開粉，味道香甜。鹹味如餐肉、蟹柳及芝士都好受歡迎，而且食落好夾。雞蛋仔外脆內軟，咬落有大量餡料，好食！
黃金餐肉雞蛋仔 $20
芝士蟹柳雞蛋仔 $25
香蕉朱古力雞蛋仔 $20
牛丸都係另一主打，當地老字號福合埕潮汕牛丸，100％手打而成，質感彈牙之餘，咬落去會唧一聲爆汁，牛肉味濃郁帶有少少牛油，肉香十足。士叻哥係唯一供應呢款牛丸嘅小食店，更有食客會買生牛丸返去！魚蛋亦是同一供應商，亦同樣香滑爽彈，配上紫菜湯，係好地道好簡單嘅美味。
牛丸 $12/3粒
魚蛋 $10/4粒，紫菜魚蛋湯 $20/6粒
小店只做外賣，即製雞蛋仔好多時都要等，不過即叫即製又抵食，難怪開業冇耐已經儲落一班熟客。
地址：深水埗長沙灣道262號地下A4號舖
文、相、片：Perrins