各位「扮」工一族無論喺茶水間或者自己位應該長期都有唔少飲品沖劑，飲厭咗普通朱古力，有唔興趣試下麥提莎或者m&m’s呢？平時食就食得多，沖嚟飲開飯仔都係第一次，即刻嚟睇邊款值得入手！
之前開飯仔行街喺優品360見到麥提莎朱古力同m&m’s朱古力沖劑，當然立刻買入幫大家試咗先講。兩款都係$39/包，就咁睇包裝Size都差唔多，不過淨重方面麥提莎就又有175g，m&m’s就得140g喇。
性價比：麥提莎 贏
既然買得返嚟，就當然希望同普通朱古力唔同啦。麥提莎打開聞到少少麥嘅香味，不過m&m’s裡面更有真·迷你m&m’s粒！望到都覺得得意啲。
沖劑特別度：m&m’s 贏
兩款沖劑都係建議加熱水或者熱嘅半脫脂奶，開飯仔就按包裝指示嘅分量沖熱水。飲落麥提莎朱古力會先試到朱古力嘅甜味，之後再有少少麥嘅味道，但陣麥味嗒嗒下居然覺得有啲啲鹹。雖然廣告話「少少鹹多多趣」，但花生就話啫，呢杯熱朱古力嚟㗎......
相比起m&m’s朱古力甜度無咁高，而且唔知係咪因為啲迷你m&m’s粒都溶哂嘅關係，口感飲落比麥提莎嘅濃厚少少。
味道&口感：m&m’s 贏
總結兩款口味其實都的確同茶水間飲開嘅普通朱古力唔同，想試下新嘢嘅話，可以考慮買包m&m’s嘅嚟試下。望住啲迷你m&m’s粒溶嗰下其實都幾有治愈感，好似係。
開飯編輯推介：
2. 9月份好評餐廳十強
熱門文章推介：
隨時接收最新資訊
讚好OpenRice專頁！