去到九龍塘，如果唔想去大商場開餐嘅話，唔少人都會選擇行一個站嘅距離去石硤尾搵食，不過除咗城大學生加南山村街坊飯堂品香樓之外，你又知唔知仲有咩餐廳可以一試？開飯仔就幫大家搵咗以下5間街坊推介，未必好味到要誇區嚟試，但去食個晏絕對無問題。唔好話開飯仔唔提你，最尾仲有甜品推介！
巴辣過癮車仔麵 肥哥車仔麵
呢度嘅巴辣有兩個意思，一，呢度最出名嘅唔係咩餸亦唔係咩麵底，而係辣汁！辣汁用新鮮指天椒、大細唔同嘅乾椒、咖哩醬、沙茶醬等香料熬成，加落豬骨清湯，再添少少腩汁就係絕配。二，呢度嘅肥仔老闆出名寸嘴。鋪仔細細無靚裝修，不過依然有唔少街坊成日嚟，就係為咗碗有靚餸同辣醬嘅過癮車仔麵。
那些年屋邨日本菜 原野日本料理
老實講呢間日本料理店其實唔太正宗，甚至非常有港式風格。但就係附近唔少中學生嘅那些年回憶，全因佢地嘅飯盒夠哂平，學生價$35（正價$39）就有個有齊小食、沙律、壽司同飯嘅飯盒，分量同味道都對得住個價錢嘅。不過佢地熱賣排行榜第一位其實係芝麻醬焗烏冬，就咁睇用錫紙包住賣相麻麻地，但打開一聞又真係夠香。
簡單窩心滿「粥」 南樂園
南山村有好幾檔抵食冬菇亭，要講到實惠嘅話就要數到呢檔粥店，粥底相當綿密有米香，無論配皮蛋瘦肉、魚片定牛肉都咁滋味，撈埋蔥花同油炸鬼話咁快又食完一碗。食粥唔夠襟飽嘅話，嗌多個大大份鹹粢飯，或者滑溜足料叉燒腸，最後飲多杯豆漿實夠滿足。老闆娘雖然忙但都會同街坊同學有講有笑，碗粥食落都特別窩心。
台式便當+小食 九龍堂
呢間小店最出名嘅就係台式便當，唔單止食嘅係紅燒牛肉、台式肉燥等台灣菜，連個盒都係去台灣經常見到嘅紙飯盒嚟㗎。唔少食家都話味道唔會太鹹，有台灣風味，但分量就細咗啲囉。所以想食得再飽啲嘅話不妨買多份台式小食，例如黃金鹽酥雞或者酥炸Oreo，加多杯台式特飲，成個Package就似足台灣夜市喇。
企理港式西餐館 樂軒廚坊
香港茶餐廳式格局，不過主要都係做返西餐，勝在乾淨企理。嘢食方面就推介焗飯同意粉。最得意嘅係佢有個經濟雙拼焗飯套餐，有吞拿魚、雞扒、牛扒、牛脷、鴨胸等配料任你揀兩款配白汁或者茄汁，跟飯或意粉，甚至貪心啲想加錢做三拼都得，港式餐廳彈性果然大。跟埋餐湯同嘢飲埋單要四字頭，唔算平不過有得任揀，打個和啦。
堅抵食雪糕球 C+屋
Lunch Time都要滿足埋甜品胃？無問題，南山村呢間雪糕屋出哂名夠抵食，特別口味$7/球，普通口味仲要$6/球。雪糕味道自然唔人工。例如新出嘅柚子味真係食得出有柚子果肉，豆腐味道夠香濃。仲有埋近年大熱嘅明治綠茶，回甘當然無抹茶名店咁香濃，但茶香亦相當清新。
一蚊一條咖喱魷魚 麥記士多
講到南山村點都要介紹埋呢間士多，因為佢有唔少為食友最愛嘅咖喱魷魚！雖然而家百物騰貴，咖喱魷魚由五毫紙一條一加就加到一蚊條，但唔少街坊都話，其實你買十蚊十五蚊，好多時候伯伯都會夾多一兩條畀你。魷魚爽口滑溜，加埋秘製咖喱汁同麻油相當香口。不過Lunch Time就唔好去啦，因為伯伯大概夜晚七、八點先開始擺檔㗎！
開飯編輯推介：
1. 【專訪】有故事的Man 手紋母親心電圖 以上門私房菜延續愛
2. 11月份好評餐廳十強
熱門文章推介：
3. 精選芋圓甜品舖PK戰
隨時接收最新資訊
讚好OpenRice專頁！
