銅鑼灣不嬲都有唔少名牌餐廳同過江龍係度站腳，畀人感覺好似得啲價位偏高嘅餐廳。唔通去到糧尾嘅打工仔，就算美食當前都要⋯忍下手？No～～銅鑼灣又唔係得貴嘢食嘅，識得搵都會搵到唔少平價又好食嘅餐廳喺度㗎！

卅蚊太陽蛋飯　兩草

圖：hilda gunso、babuyau

餐牌上主要有兩款飯類、主打嘅肉骨茶、同咖央多士呢類小食。一碗細細地嘅飯加個小食就＄40，或者淨係一碗飯就＄30幾，老銅呢個價食得飽都算係咁。斑蘭咖央多士椰香重，醬亦落得夠多。而呢碗燶邊荷包蛋煎肉餅飯，建議大家將流蛋黃、蔥花、甜豉油撈埋一齊食就prefect。

無味精住家小菜　住家菜

圖：Percytsw、muitommy

如果平時冇乜機會食到日常住家菜嘅你就啱啦～全部主打無味精同少油。除咗有每日精選嘅養生老火湯之外，每日午餐都有唔同餸揀，就連蒸魚飯都有，大概＄50蚊包埋湯同糖水。晚市嘅煲仔菜都幾大份，特別係茄汁蝦碌拎嚟送飯一流！

清淡簡單之選　合和荳品

圖：hkfoodivore、l.tsui

大大隻山東餃子　北方餃子源

圖：cream_food、kimmamon

呢度主打大大隻夠實在嘅山東餃子，餃子餡係每日新鮮手工製作，蒸餃又得煎餃又得；淨食又得配麵食都得，最緊要平得嚟又食得飽！細食少少食5隻餃就ok嘅朋友，三十蚊唔使就可搞掂一餐晏仔，糧尾時期好啱使。山東餃子嚟講，京蔥羊肉餃幾乎係必叫口味，陣陣羶香啊。

元朗名物車仔麵　永年士多

圖：ilovemybearbear、emilykaaa

車仔麵永遠都係香港人嘅comfort food！港島人以前要好神心，山長水遠入元朗先食到，而家唔使啦。推介流心蛋、豬大腸同豬紅。豬大腸一般坊間多用冰鮮貨，而呢度就用咗新鮮貨，而且洗得乾淨冇異味。湯底亦唔係味精湯咁hea，而係用咗老雞、豬骨、雞腳、同藥材煲㗎！三餸麵＄43，仲想點？

文：Yanny