跑「素」朋友又有新飯堂可以一試！呢間新店位於銅鑼灣登龍街，從台灣引入素食自助餐嘅概念，超過80款選擇當中既有中式素菜，亦將世界各地嘅Vegan潮流帶嚟香港，好似自由配搭嘅素食漢堡，餐廳自家製果乾配麥皮等，增加新鮮感。
 

放下素主打素食自助餐，原來因為店主有見台灣有唔少人食素，當地嘅素食自助餐餐廳自然比較專業，另一特點係會用多款蔬菜水果入饌。對比起香港嘅素食餐廳就多以傳統佛教素食為主，選擇較少。新店就保證每餐至少有80種不同選擇，特別請嚟有多年烹調素食經驗嘅師傅坐陣，亦從世界各地搜羅新鮮水果。
 

最特別嘅要數到自製素漢堡，建議步驟係先烘熱鍾意嘅麵包，之後加爽脆嘅蔬菜例如生菜、青瓜，放上素漢堡扒，加鍾意嘅水果，最後加上醬汁就大功告成！
 

餐廳自家製嘅漢堡扒以紅腰豆同鷹嘴豆為主，香菇、羅勒、紅蘿蔔、馬蹄等配料會按時令更換，口感柔軟帶香料香味。無諗到菠蘿加落漢堡到無違和感，反而感覺更清新。另一亮點係沙律醬加咗黑松露，好香口！
 

另外餐廳亦特別購入風乾機自製鮮果乾，經10小時風乾後其實並未完全抽乾水分，口感帶少少煙韌，味道同香味就更濃縮。
 

鮮果乾除咗就咁食，亦可以參考北美食法，將果乾、果仁等加到麥皮當中，令本身味道同口感都比較單調嘅麥皮變得豐富！橙、蘋果、香蕉、同提子乾相當百搭。
 

熱食首推嘅係Pizza！Pizza底夠薄，加上蕃茄、羅勒同芝士呢個不敗組合，味道香濃。批邊脆卜卜，又係加哂分。
 

其他熱食以中式小菜為主，用電爐或熱燈保持溫度。亦有部分係涼拌菜式，選擇多元化。
 

醬香豆腐球係人氣菜式之一，醬汁鹹中帶少少辣，相當醒胃。豆腐球食落口感有啲似比較腍嘅牛肉球，混入馬蹄粒令口感更豐富。天婦羅嘅外皮亦相當香脆。
 

沙律吧亦有唔少新鮮蔬菜，配紅腰豆、鷹嘴豆、南瓜等比較飽肚嘅食材一樣健康。而且有多款自家製醬汁畀大家任意配搭，自由度高。
 

最後建議大家嚟食之前訂好位先，始終小店座位有限，而且自助餐係按時段收費嘅，以下係新店開張頭3個月嘅特惠價，部分時段只有45分鐘，按開飯仔經驗嚟講就會比較趕，想同朋友一邊傾計一邊食嘢建議至少食60分鐘啦。

開張特惠價^：
11:45 - 12:30（45分鐘）$68/位
12:35 - 13:25（50分鐘）$80/位
13:30 - 14:30（60分鐘）$85/位
18:00 - 17:10（70分鐘）$98/位
19:15 - 20:30（75分鐘）$128/位
20:40 - 21:50（70分鐘）$98/位
^另收加一服務費，最終收費以餐廳屆時定價為準
 

放下素
地址：銅鑼灣登龍街28號永光中心3樓

文、相、片：Cathy