經營一間餐廳，想吸引人注意真係少啲創意都唔得。好似荃灣呢一間新開餐廳Hygge，就有一款飄浮半空嘅氣球甜品，可以成個食落肚，好玩又吸睛！
原來呢款edible balloon，早前美國大熱，連米芝蓮餐廳都供應。Hygge店主就研究製法，更買入一整支氫氣。要整呢款甜品好有難度，氣球外層其實係以粟粉、魚膠等製成嘅糖漿，但要小心控制溫度先至成功吹得起。氣球質感有啲似大白兔糖糖衣，但就較黏身，而且有焦糖薄荷味，食任何甜品都會附送！
店主及大廚班底都是80、90後年輕人，為一圓創業夢而開餐廳，唔甘於做普通西菜，融合日本、泰國、印度、法國做法炮製無國界菜式，充滿玩味。用料講究，以猶太鹽煮牛扒，鹹度較低唔會蓋過牛肉味。咖喱都係印度油及香料自家炒製。
前菜麵豉迷你班戟，班戟上舖滿麵豉蟹肉，配上自家製西米脆片，西米加入麵豉炸成薄脆，一脆一軟，鹹香又富鮮味。
麵豉迷你班戟，麵豉蟹肉，麵豉西米脆餅 $78
另一道泰式紅蝦刺身，用上西班牙紅蝦，將泰式生蝦刺身汁製成濃縮杰身醬汁，配上明太子一齊食，食落比泰式生蝦更鮮甜軟滑，加埋越南炸蒜片，同樣有一脆一軟口感。
泰式紅蝦刺身，炸越南蒜片，泰式青辣椒汁 $88
油浸鴨髀窩夫有如Duck & Waffle名菜，窩夫加入鴨油及花椒油製成，本身帶微鹹，鴨髀非油炸，而醬汁煮成冇咁乾身，再配上花椒油荷蘭汁同吃。
油浸鴨髀窩夫，花椒油荷蘭汁 $168
A4鹿兒島和牛亦唔係只煎香咁簡單，腐竹用牛肉汁煮過，包住煎至半生熟的牛扒，配葱及薑絲，有少少中式風味。大廚話用腐竹希望可以減低和牛油膩感，但食起嚟仍然有牛肉香。
A4鹿兒島和牛 腐竹，牛汁，薑絲，葱 $238
黑鱈魚西京燒賣相似壽司，鱈魚用麵豉醃足一晚，「壽司飯」就係加入豆豉煮成糯米飯，味道鹹香。
黑鱈魚西京燒，豆豉蒸糯米飯 $248
最花功夫就係海南雞咖喱斑蘭糯米飯，原隻三黃雞去骨，釀入自家炒製印式咖喱，亦加咗斑蘭葉令糯米飯更加清香。雞肉仍然保持嫩滑，咖喱香料味重，好香口。
海南雞咖哩斑蘭糯米飯 $268
菜式坊間少見，而且每一道都花足心思製作，價錢唔算太貴，值得幫襯啦！不過留意返，除氣球外，所有菜式於3月1日先開始供應。
地址：荃灣荃灣大壩街5-7號仁蕙苑地下3-4號舖
文、相、片：Perrins