尖東開咗個新商場喎，無論係外型定係內部設計都相當時尚同充滿藝術感，各位專業呃likers，你哋去咗打卡未先？喺商場嘅中庭，望上去有個標誌性嘅Gold Ball，下面就有間開放式嘅餐廳酒吧，提供全日供應嘅高級下午茶，同埋各款特色cocktails等。

呢間餐廳相當有格調，以酒紅色同金屬銅色為主調，有種典雅大宅嘅感覺。主力提供兩款下午茶，一款係二人套餐，另一款則係一人高級享受，包括有魚籽醬、鮑魚、松露等矜貴食材。兩款下午茶都係以3D打印技術特別訂製嘅茶點掛架盛載住，懸浮喺枱上面，靚到咁，絕對係要畀相機食咗先囉。

二人套餐（$690/2）有6款鹹點同7款甜點，另外仲有自家烘焙鬆餅配忌廉及自家玫瑰果醬同埋茶啡。鹹點中較特別嘅，採用法國血鴨鴨胸肉製作嘅法式血鴨包、有金箔點綴嘅魚籽醬包點同埋半生熟嘅吞拿魚薯片等。

甜點則有靚靚嘅法式鮮花奶凍，配上新鮮士多啤梨同藍莓，入口清新；甜粟棒棒係白朱古力加粟米mousse，甜身軟滑；而軟香芝士杯則以raspberry做底，上面再加cream cheese同朱古力脆米。

至於想食豪啲嘅，一人份奢華下午茶餐 （$1688/1）應該可以滿足到你，樣樣鹹點食材都好高級下，包括有10g嘅Amur Beluga魚籽醬配「金蛋」、以金箔包住嘅和牛配喜馬拉亞岩鹽磚、鮑魚配西米脆脆，仲有相當有氣勢嘅龍蝦串同松露等。

一人份嘅甜品亦稍為有啲唔同，最特別嘅係呢個果甜漢堡，原來係漢堡造型嘅馬卡龍嚟呀，啲「青瓜」、「芝士」呀實情係芒果朱古力同綠茶吉士嚟！想食嘅話建議最好早3日預訂啦~

除咗下午茶set外，呢度都有單點選擇嘅。最吸睛就梗係櫻花大蝦漢堡啦，成條虎蝦橫躺咗喺漢堡隔籬，配埋牛油果、柴魚片、櫻花蝦蛋黃醬等，係豐富嘅。麵醬鱈魚扒則採用白味噌醬烹調，伴以醒胃嘅紅波椒汁同香草醬脆片，口感多元化。

 松露素菜雲吞、竹炭沖繩三層肉

話明係酒吧，當然唔少得cocktails啦，款款嘅賣相都精緻到一捧出嚟就會嘩嘩聲，好似呢杯cave咁，以干邑白蘭地作基調，加入血橙、檸檬：而Emperor，則用咗中國傳統白酒山西汾酒，加埋vodka同佛手柑，帶有陣陣微酸果香味。

呢度樣樣嘢都好有藝術氣息，就連粒朱古力都係經過精心設計！由澳洲朱古力大師與藝術家Ryan L Foote以K11 MUSEA嘅風格作為設計概念，獨家製作加入亞洲元素嘅3D打印藝術朱古力。好似Gold Ball造型嘅係濃醇奶茶味，而直情就係迷你K11 MUSEA嘅嗰粒就係15年陳皮味！

Artisan Lounge
地址：尖沙咀梳士巴利道18號Victoria Dockside K11 Musea 地下008-008A號舖

文：Kar
相、片：Tom Li