喺國內坐擁75間分店嘅映水芙蓉近日進駐尖沙咀，除咗霸佔270度嘅無敵維港大靚景，菜式亦見驚喜。一講起四川菜，都會令人想起血一般的麻辣火鍋，好有火辣辣嘅味道。但映水芙蓉話畀我哋香港呢班「土包子」聽，其實四川菜並非只得麻辣架！

相比起重慶麻辣，成都菜比較重視麻香，菜式雖然都帶微微辛辣味，但口感溫和好多，唔會令食客辣得眼淚直飆，亦唔會畀「辣」遮掩其他食材嘅味道，而且部分菜式更是不麻不辣架！有啲乜？快啲睇睇！

敲糖棒棒糖($168)係一道賣相好靚嘅四川傳統菜，可算係餐廳必食top 3之一。以閹割咗嘅三黃雞肉搭配翠玉瓜絲煮成，再以水滴形糖衣包住由成都二荊條、成都中椒、貴州貴頭、貴州子彈頭及紅油造成嘅辣汁。甜甜嘅糖衣可避免口感過於辛辣。

進食之前，客人可輕敲糖衣，讓辣汁漏出嚟，再將雞肉、翠玉瓜絲撈勻就食得！味道微辛，但不至於太辛辣，而雞肉質感嫩滑得嚟都幾有嚼頭，雞味亦濃，再夾埋清爽嘅翠玉瓜絲，好食！

千絲西葫蘆($68)賣相好似中式如意結咁，翠玉瓜嘅形態似片又似絲，其實係透過師傅嘅一雙巧手，將已切絲嘅翠玉瓜一片片咁擺放，砌出如意結嘅樣子，好精緻。臨食之前再淋上自家調味嘅豉油，好啱做頭盤。

已有百幾年歷史嘅成都名菜蓉城雞豆花($88)，手工非常繁複，講緊嘅就係呢片滑溜嘅偽‧豆腐。

無錯，呢塊絕非一般豆腐，而係用雞肉、淮山做成架！師傅用雞胸肉不斷剁成茸，再用牙籤挑去筋部，令雞豆花口感尤如真豆腐咁香滑，又有濃濃嘅雞味。另配不太油膩嘅雞湯，好味。 

招牌蝦膏泡瀘沽湖紅米飯($198)，以嚴選四川瀘沽湖盛產嘅紅米、湖蝦入饌，以烤過嘅湖蝦、蝦膏、南瓜等配料熬咗10幾個鐘頭而煮出濃郁湯底。

用保持熱力嘅石頭鍋盛載，並喺上枱時先淋上湯底，讓石頭鍋熱力將湯底香味滲入紅米之中。

以冬瓜絲造成嘅椰汁素燕($68)，口感清爽啲，配埋暖笠笠椰汁，食落好滋補。

大珠小珠落玉盤($198)，菜名來自唐代詩人白居易《琵琶行》，好有詩意。以青豆、茨實而成，味道雖淡，但勝在賣相一流。

核桃沙律釀小番茄($88)，喺小番茄入面有核桃及沙律醬，口感好fresh。

餐廳佔地超過4,000呎，加埋落地大玻璃以及接近270度維港海景，可以話無得輸。地方寬敞舒適，尤其是室外座位，新年睇煙花最啱。

映水芙蓉
地址：尖沙咀廣東道3-27號海港城海運大廈2樓OTE 201號舖

文：Joy