最近多間國內麻辣火鍋嚟香港開店，唔係Sell特別造型紅油就係Sell夠麻辣。灣仔呢間中菜館就換個角度：推出創新清啤麻辣湯底！麻同辣平衡有致，倒埋支啤酒落去香味「升呢」，話唔埋會係各位酒鬼嘅「醉」愛。
 

京川小碟火鍋體驗套餐

位於灣仔嘅日熹樓今次嘅日熹火鍋道——京川小碟火鍋體驗套餐，顧名思義參考咗西方Tapas小碟嘅元素，套餐選擇豐富而且分開呈上，幫傳統中菜換個新包裝。
 

清啤麻辣鍋

話明係火鍋，最重要嘅當然係個鍋啦！當中最特別嘅一定要數到呢個清啤麻辣鍋，首先可以先試下餐廳自家秘製麻辣湯底。用咗花椒粒、乾辣椒、薑片、八角、茴香等多種香料，雖然滾起嘅時候聞落唔算好刺鼻，但辣味同舌頭感受到嘅輕微麻痺感平衡得唔錯，真係相當刺激㗎。
 

安格斯牛頸脊

麻辣湯底最啱配牛肉，所以開飯仔建議大家肉類可以揀安格斯牛頸脊，脂肪唔多但肉味香濃，口感仲特別爽滑。
 

食到差唔多就可以將支清啤倒落鍋，一方面減低辣度，另一方面增加啤酒小麥香，令成個火鍋香味更有層次。清啤麻辣湯底就最啱配海鮮，配搭同辣酒煮花螺有異曲同工之妙。
 

不辣口水雞

醉拿手

食到條脷痺痺地，可以食返啲涼菜舒緩一下。八款涼菜每位可以選擇兩款，有辣有唔辣任君選擇，不辣口水雞惹味得嚟雞肉爽嫩，而醉拿手其實即係醉豬手，酒鬼要點呀。
 

手打鮮蝦丸

山東家常水餃

丸同餃子都係熱門火鍋配料，呢個套餐可以畀大家任揀一款手打丸同手作餃子。手打鮮蝦丸唔單止清楚見到蝦肉，食落亦相當鮮甜彈牙，無俾麻辣湯底完全蓋過。而山東家常水餃亦夠哂足料，如果水餃皮再薄多少少就更好喇。
 

新鮮雜菜籃

桂花糕

套餐仲包埋豐富嘅新鮮雜菜籃同甜品桂花糕，特別係桂花糕夠清甜，中和返麻辣湯底嘅辣勁。
 

中式雞尾酒：Earnest 實 

無酒精雞尾茶：香茅鐵觀音

每位仲可以揀一杯特調飲品，酒鬼當然唔可以錯過佢地嘅中式雞尾酒，加入中國元素更有特色。唔飲得酒嘅話亦可以一試佢地嘅無酒精雞尾茶，入口零舍清爽得嚟不失中國茶嘅悠長餘韻。所以話傳統中式火鍋其實都可以完全唔老土！
 

日熹樓
灣仔杜老誌道6號群策大廈4樓及5樓

文、相、片：Cathy