銅鑼灣作為港島區嘅美食地帶之一，當然係要keep住有新嘢食啦。而呢區裡面嘅其中一間大型百貨公司，最近終於重新裝修完，仲帶嚟咗好多間新嘅舖頭同過江龍餐店！

北海道芝士蛋糕   Petite Merveille

又一間北海道芝士蛋糕店，芝士控真係好有福。呢度主要嘅產品有幾類，細細件嘅一口芝士蛋糕，有原味、抹茶味同朱古力味，芝士味都好香濃，入口鬆軟，有啲似疏乎厘嘅口感。另外嘅卷蛋糕同原個芝士蛋糕同樣鬆軟，而且輕身唔太膩。櫻花卷蛋糕係4-5月限定㗎留意返。
地址：銅鑼灣祟光百貨B2層 14B 號舖

長崎蛋糕   黑船

呢度有幾款日本糕點呀，包括原味同抹茶味嘅長崎蛋糕，蛋香味濃，可以存放一個月。另外十勝紅豆銅鑼燒同京都抹茶銅鑼燒，外皮鬆軟，內餡微甜，作為零食都幾唔錯。而波浪型嘅餅乾就有朱古力味同抹茶味揀，兩款中間都有夾心醬呀，甜甜地脆脆地。
地址：銅鑼灣祟光百貨B2層

英國特色朱古力   Hotel Chocolat

嚟自英國嘅朱古力店，第一次進駐亞洲就選址香港，仲推出咗隻淨係得香港先有嘅Hello Hong Kong榛子牛奶朱古力，軟滑得嚟又冇想像中咁甜，不過最令人驚喜嘅喺芸芸嘅朱古力款中，有alcohol系列呀，香檳、mojito等等都有！酒鬼必試，仲要試埋可可黑朱古力酒呀。
地址：銅鑼灣祟光百貨B2層07E舖

日本魚餅  玖子貴

呢間嚟自日本嘅魚餅店，有成10款魚餅咁多，最吸引肯定係流心蛋魚餅，彈牙嘅魚漿包住溏心蛋，再炸到金黃色咁，切開啲蛋黃汁仲要緩緩流出，嗚呀！另外仲有北海道粟米、香蔥檸檬鹽魚餅、北海道魷魚等等，哎呀，選擇困難症又發作，點揀好？溫馨提示如果唔係即買即食嘅話，可以用微波爐加熱1分鐘左右先食，又或者用煎鍋加熱嘅話就可以保留到佢彈牙嘅口感添。
地址：銅鑼灣崇光百貨地庫2樓B2-15A舖

東京牛油甜點   BUTTER BUTLER

上年喺新宿開張嘅高級牛油甜品店，而家嚟到香港開首間海外專門店喇！佢哋嘅產品係嚴選世界各地嘅優質牛油去製造，最受歡迎嘅就係牛油費南雪。細細一塊方型嘅費南雪，外層烤至酥脆，內餡就幾鬆軟，楓糖味超香濃，不過就濃到有少少蓋過咗牛油嘅香味。

而焦糖白雪餡餅就有幾層，最外邊係曲奇餅底，圍住晒成個cake，係幾脆嘅。跟住中間嘅餡就一層cream一層意大利芝士夾住焦糖，面頭再淋埋焦糖醬，所以食落幾感覺都堅係幾甜下！建議唔好雪冰箱，拎出嚟攤一攤就好食，咁樣口感實實地似雪糕啲。另外嘅夏威夷牛油蛋糕亦相當有驚喜，就咁睇以為係普通嘅牛油蛋糕，但食落原來煙煙韌韌，仲有啲椰香。
地址：銅鑼灣祟光百貨B2層26D號舖

法式鹹批    Quiche Yoroizuka

呢間法式鹹批專門店嚟自東京，除咗有本身嘅4款口味：香橙杏仁、龍蝦汁蝦肉、羅蘭士（野菜、煙肉）、法式焗洋蔥之外，另外仲有1款係香港嘅限定味：鎧塚厄瓜多爾可可農場朱古力，比起一般嘅朱古力，可可味顯得更香濃，不過一個人食晒一個可能會有啲滯呀。而師傅亦有建議可以自己加埋啲紅桑子、藍莓等等嘅生果伴碟一齊食。
地址：銅鑼灣崇光百貨地庫2樓15C舖

脆口海鮮煎餅 越前海鮮俱樂部

源自日本嘅呢間舖，主打海鮮煎餅，有魷魚、八爪魚、甜蝦、帆立貝等去烤製煎餅，即叫即烤，拎上手仲係熱嘅，薄薄地一塊，超級脆口。
地址：銅鑼灣祟光百貨B2層29號舖

神戶鹹牛批   Kobe Beef Meat Pie

同樣都係嚟自日本，舖頭主要有幾種批餅，當中包括招牌嘅神戶牛肉批、甜食嘅蘋果批同安納芋蕃薯批等等，其中神戶牛批外層酥脆，內餡都夾咗幾多牛肉粒同埋洋蔥粒下，幾香，同埋幾飽。建議可以加入微波爐加熱廿秒，或者放入多士爐用低火焗2分鐘，甚至可以加埋芥末同茄汁一齊食都得。
地址：銅鑼灣祟光百貨B2層14C號舖

文、相：Kar