「一盅兩件」一向深受香港人歡迎，一齊睇吓有咩最update嘅點心放題餐廳～有酒店級，亦有平民啲嘅連鎖酒樓，豐儉由人。

送極品花膠灌湯餃+鮑魚燒賣 御名園

90分鐘午市點心放題超過40款經典同特色點心，必食點心包括鮮味蝦餃皇、海皇醬蒸鳳爪、養生像形核桃包同千層飄香榴槤酥等。海皇醬蒸鳳爪將鳳爪出水後，連同爆香嘅乾蔥、蒜頭同薑拌至微微金黃色，之後再加入海皇醬拌勻，每隻鳳爪均沾滿海皇醬嘅香味，食落軟腍又入味。每位成人更敬送極品花膠灌湯餃同鮑魚燒賣～

經典懷舊點心 唐述

圖：foodiechuxx

位於中環嘅fusion中菜館，裝修奢華有格調，最啱帶埋屋企人嚟試吓。餐廳近日推出香港懷舊點心早午餐，有指定前菜、湯同主菜，例如櫻花蝦汁煮龍蝦、砂窩菌香雞。另外仲有多款無限量點心及甜品，款式都好經典，包括鵪鶉蛋燒賣、錦鹵雲吞、陳皮泥鯭粥等，而芝麻卷、白糖糕、馬豆糕同開心果露等懷舊甜品都可以喺度食到。

五星級點心放題 凱悅軒  

圖：monkey cat

想帶埋屋企人食得開心又舒服，呢間酒店嘅中菜廳就啱晒啦！優雅嘅用餐環境配上傳統風味嘅經典點心，好啱一家大細食。點心放題足足有成120分鐘，包括精緻點心、小食、甜點共20多款，雖然選擇冇話好多，但質素都好高。必食馳名蜜汁叉燒，燒得好香兼肉質軟腍；飛魚子燒賣都大大件又彈牙。

任食點心+Mövenpick雪糕 龍逸軒

圖：Kan Lee

呢個「任點任食點心Brunch」一向都好人氣，有前菜、湯羮、蒸煎炸點心、飯麵主食同中西甜品，款式多樣化之外，分量仲可以揀半碟或一件，簡直係任食嘅福音呀～推介沙律醬蝦多士，入口焦香唔油膩，蝦膠新鮮彈牙，點埋沙律醬令人更滿足；粉彩松露石榴球都唔錯，餡料係菇菌同黑松露，超香濃。另外仲有而家好罕見嘅糯米包，新派啲則有櫻花蝦潮州粉果、蟹肉菜苗餃，以及十年陳皮紫米豆沙包等。

文：Yanica
編：Cathy