氣溫驟降又如何？真正鍾意食雪糕嘅人係無懼氣候變改，愈凍愈愛食嘅！特別係發現7仔有返軟雪糕賣嘅話，就更加要食啦。

細細個，兩大便利店都有即唧軟雪糕賣㗎，行街最鍾意就係睇下佢嗰期係咩味，一有新味就試。不過大個咗就冇咗呢支歌仔唱，7仔啲軟雪糕機唔見晒。直至今年年頭，喺金鐘有7-11概念CAFE先至叫做有返，不過都係得3.5牛乳一隻味。



等呀等，等到最近，終於有多隻味喇！仲要係宇治抹茶味呀！除咗有甜筒之外，仲有窩夫揀。估唔到喺7仔都可以食到宇治抹茶窩夫，雖然對比起好多甜品舖，呢個窩夫淨得脆餅同抹茶雪糕就乜料都冇，係遜色咗少少，但夠快夠方便嘛，唔使排隊唔使等。

唔講咁多，即刻試味！窩夫有蛋香味，脆脆der，而主角嘅雪糕有淡香嘅抹茶味，不過奶香味相對嚟講再重啲，唔算話太甜咁都唔錯，最抵讚係軟雪糕中間冇窿窿㗎！



全港暫時好似得幾間分店有咋，港九新界各區一間：
旺角：豉油街 60-104 號
荃灣：荃灣千色匯地下G8號舖
金鐘：力寶中心1樓2B舖

文：Kar



其他最新飲食潮流：
旺角掃街新誘惑 超巨拳頭蟹籽芝士手打墨魚球
任食邊爐界新勢力 素食者福音 中環餐廳推素火鍋
行便利店有新發現 紫薯牛奶 X 新出抹茶雪糕（有片）


 

隨時接收最新資訊
讚好OpenRice專頁！