一碗小麵

營業中

休息中

川味麵館，叫了招牌一碗小面，入面有豬手、豬大腸、牛肉，香辣可口，份量十足。仲叫左一碗牛雜麵，有牛肉牛肚，都係份量十足。味道都幾正宗，老闆娘話辣椒都係四川運過來，正宗四川味道，叫左BB辣，麵條彈牙，湯底香辣開胃，幾好食。餐廳地方比較窄，但環境企理，檯面都好乾淨，好多附近理工學生來食，前後左右都係講普通話。應該好多內地學生都好認可依間普通。老闆熱情有禮，麵條米飯免費任加！幾有人情味👍

繼前一日東主有事摸門釘之後，第二日再戰終於試到一碗小面啦！一坐低老闆娘就為我地送上涼拌青瓜，醋同麻油醃製過後的確好醒胃，喚醒左我哋嘅腸胃，準備迎接一碗小面！招牌一碗小面湯底可選麻辣/酸辣/泡椒/酸菜，配唔同辣度，麵底則可選擇上海細面/米線/薯粉。我揀咗酸辣湯底、小辣、配上海細面。湯底嘅酸味比辣味重，比想像中少油。餸非常足料，尤其炸醬好大pat，唔會剩係得肥膏冇肉碎。豬手雖然唔多，但好飽滿好淋，豬腸肥美滷得入味，牛腩都有好多舊。個面吸晒湯底但又唔會浸得好淋，唔錯唔錯！同事揀咗BB辣麻辣湯底，驟眼望落去同酸辣湯底冇咩分別，試咗一啖後覺得辣度同小辣嘅酸辣湯底差唔多，但多咗一分麻嘅感覺。食完個面會㷫烚烚，我哋就叫咗黑糖冰粉解解渴！老闆娘仲好好人咁比咗個半價我哋，話唔係好多客識得欣賞個冰粉喎。我哋都覺得個冰粉幾正，口感有啲似台灣嘅愛玉，不過再爽D，因為冰粉本身冇乜味加黑糖都唔會太甜，食完辣嘢食佢真係好爽喎！希望多D人試吓呢個糖水，發掘佢吸引嘅地方啦！