沾仔記麵食 (已搬遷) 新店位置

女朋友係佐敦返工，佢成日話這間店好食，於是今日經過就諗住試下佢。星期六中午入去，都坐到差唔多滿曬，可能因為本身座位比較少既關係。我諗食飯時間去基本都要同人搭枱，不過都係大概4個人坐一張枱相對都算舒服，唔會好似潭仔食飯時段迫到6個人一張枱。食物選擇不多，最特別就係雲吞，因為比市面上既大好多，又好足料我同女朋友各點左一碗雙拼，分別係雲吞牛肉同埋雲吞鯪魚球。鯪魚球分量都好多，但係後知後覺既我問返女朋友先知道，如過兩個人去食，又想食兩樣餸，其實唔洗分開叫兩碗雙拼，可以叫兩碗唔同餸既單拼。因過原來叫雙拼係比單拼貴5蚊，但係雲吞同鯪魚球加埋同單拼一樣係比4粒。一舊雲吞入面有超多蝦仁🍤，真係相當足料。一碗有4粒都係29蚊又真係幾抵食。最後想講佢仲有玻璃瓶既可口可樂飲（但得細支裝）。

師傅食到唔湯唔水咁, 加上谷住度氣, 真係冇癮; 懷住一夥不是味兒的心情由老尖行落去佐敦, 諗住邊行邊搵野食, 順便出身汗發洩一下! 沿路師傅又覺得冇咩吸引或者想食, 不經不覺就行到去佐敦, 黎番自己地頭, 師傅更加想唔到有咩可以食? 但忽然間師傅個腦閃左呢間食店出黎, 心諗如果仲未落閘就入去食啦!去到門口當時係晚上九點半過左,可幸的是店內依然燈光火猛; 雖然見唔到黃燿明同蔡德才, 但依然係咁人山人海! 師傅唔理咁多, 即刻行入去搵個位坐底先! 講都冇人信, 師傅喺呢區都打滾左一段頗長時間, 但由始至終都未黎過呢度食野, 點解呢? 師傅自己都不得而知, 既然機會難逢, 咁就即刻柯打野食! 師傅今次大貪d, 整個雙拼啦, 就要雲吞鮮牛肉麵! 等左一陣雲吞鮮牛肉麵就登場, 師傅一如以往就係先試下個湯底, 湯底味道一般, 並不太特別; 再望下雲吞得兩大粒, 鮮牛肉有五至六片; 先講下雲吞, 雲吞真係幾鬼大粒, 而雲吞皮又滑又薄, 內裡嘅餡料就真係好多蝦同埋冇肥豬肉, 加上蝦身幾爽口同幾鮮, 真係不錯, 如果能再多幾粒就更好; 而牛肉就鬆身, 味道都可以, 冇咩特別; 至於個麵係生麵, 麵身