多寶美食

營業中

休息中

因為屋企隻寶貝狗糧尾啦...所以今日要去金魚街買狗糧。呢幾日天氣開始熱返，人流又開多返...下午時間真係熱辣辣~熱辣辣~好熱~好熱~ 所以要拿拿聲買完返屋企休息，泊好架車之後就買狗糧先。既然經過太子，為食既我一定會飲杯椰汁同埋食件臭豆腐先至安心。咁好啦，都係一如以往買完狗糧之後就行個圈睇下有冇嘢食，掃街就必然首選，最緊要快、靚、正。行行下見到有檔嘢入面有個人熟口熟面，吹左兩句原來就係以前幫襯過，以前喺廟街開檔嘅依家搬咗過嚟太子  ，吹左幾句算啦，因為堅講趕時間，下次先再慢慢傾。既然呢一間係以前幫襯過嘅就知道質素高  。因為以前係廟街好多人排隊，等食都等好耐。咁照舊第一時間就叫左兩件臭豆腐先，但可惜既係佢呢間招牌炸大腸因為中午剛開舖，所以未有住就有少許可惜，不過唔緊要，最後我都執左幾樣野。首先講下我嗌咗啲咩嘢食先啦：有臭豆腐、雞肉腸、魚蛋、牛丸、墨魚、水魷、仲有兩溝（即係魚肉碗仔翅），呢啲美食基本上所有香港人都知道，係香港嘅特色，而且仲係超好食。等咗大約十分鐘所有嘢都搞掂晒，咁同老闆拜拜之後就飛返屋企開餐啦。返到屋企隻衰狗已經等緊我，梗係啦，因為有糧草啦... 好啦~ 好啦~ 上枱啦!!

放工途經太子一間人氣好高嘅小食店「多寶美食」，有好多人企喺度食緊，好奇嘅我又停低腳步睇睇🦶。小店主打各式各樣嘅港式街頭小食🇭🇰，款式唔算特別多，集中賣某幾款。佢價錢相宜，成個餐牌打爆晒的話，都係二百蚊有找🤣。馳名炸大腸($16)，朋友好鍾意食，即場啪咗一串。我自己本身就唔好的🙈，小店嘅出品氣味比較強，但沾辣醬同芥辣食又OK喎，因為炸得夠脆。魚肉碗仔翅($25)，單拼$22，雙拼$25好似抵食啲。碗仔翅口感唔錯，唔會太稀或杰撻撻，而且好足料，有雞絲同素翅等。另外拼嘅魚肉有好多嚿，質感唔粉，鯪魚成份唔高，所以亦唔腥🐟。墨魚/水魷魚($13)，🦑小店嘅墨魚以及水魷魚同樣處理得宜。佢哋保留咗應有嘅彈牙口感，但又唔會太硬，老人家都食到。牛柏葉($13)，牛柏葉爽脆，大小切得啱啱好，易咬🐮。山根($10)，山根口感煙煙韌韌，非常索汁🤤。最後就係大雜燴：燒賣魚蛋雙拼($20)同牛丸($16)，前者係基本野🍢，食材質素正常，精華所在係個咖喱汁，佢辣得過癮，係好經典嘅港式風味🌶，正啊。一串牛丸有四大粒，食落幾彈，似牛筋丸，唔係街市平價貨。總括嚟講，小食店出品有水準，價錢大眾化，難怪有咁多人幫襯👍。最後，

多寶美食喺佐敦嘅時候我已經成日幫襯，最近佢仲搬咗去太子金魚街，更加近我，當然要多啲嚟幫襯支持下。食物仍然係咁繽紛，每次我都會揀好多款。搬咗新舖，但食物依舊，係令人懷念嘅味道。就算而家喺街唔方便食嘢，都堅持一定要食佢哋嘅馳名炸大腸，新鮮食外皮卜卜脆，我就鍾意加甜醬食。魚肉碗仔翅嘅魚肉份量超多，而且夠彈牙。牛丸總共有4粒，而且超大粒，粒粒夠入味。山根索哂汁超夠味。燒賣一串有5粒，口感彈牙，混入少少辣汁好正！魚蛋同樣5粒。墨魚彈牙又入味。水魷魚就爽口卜卜脆。牛柏葉沾滿醬汁味道冇得彈。