丹麥冰室

營業中

休息中

lunch time時間約下朋友喺附近食飯見面, 行去新開呢間丹麥冰室試下😙 去到以為唔使排隊點知原來好長龍🙈 連外賣嘅人都唔少👍🏻個Staff好好人, 安排咗卡位俾我哋坐🤩 可以坐得舒服啲傾吓計🙏🏻 我哋兩個都係嗌咗佢哋嘅午餐set🍻 羅宋湯係好好飲如果再辣少少更好, 我叫咗咖喱焗魚柳飯, 係估唔到地好食😋咖喱汁底有落椰汁所以好香, 魚柳亦都好脆口做到外脆內軟🤩🤩🤩 炒飯底焗飯👍🏻👍🏻個餐唔貴🍻 下次再去食😙

好耐冇過嚟丹麥冰室食野lu…咁啱今日放假 約左朋友係附近就過嚟食少少野🙆🏼‍♀️餐牌轉左 見到有金邊粉噃叫左個甜酸蝦仁肉鬆炒金邊粉顏色比較淺色 個味道唔錯 蝦仁都大粒👍🏻👍🏻👍🏻👍🏻

疫情嚴重 好耐冇係餐廳堂食。今日下午茶時間係灣仔丹麥冰室進餐。行入門口已見新增好多好靚既食物掛畫。可能疫情加下午茶關係。唔駛等位。二人一台，坐得好寛鬆，而且冷氣好夠，十分之chill 。今次見到有新好多新野食 揀左個喇叭海鮮金邊粉、份量十足 海鮮都十分之多 、椰香味濃厚，岩哂我。而且價錢非常便宜。另外叫左杯凍奶茶🥤茶味適中 奶又唔會太重。飲落都好滑。唔會太甜、唔錯。事前員工仲送左碗老火湯。味道濃厚。飲得出冇落味精、滿分。會再次光臨。

第一次o黎食，鲜茄朱扒飯，凍咖啡！朱扒飯嘅朱扒太硬，死木木，凍咖啡完全唔掂，可能係下午茶時段，有D苦涩味，又淡味！只是位置好，如果在内街，都唔知有冇生意，希望下次试早餐，有意外驚喜！

本身我係一個都幾鍾意食沙嗲牛麵嘅人，去食早餐九成都叫沙嗲牛。今次試吓公司樓下嘅呢一間茶餐廳，要讚下佢個多士平時食開都係一塊麵包烘底，但係佢都算整得唔錯，多士鬆軟，咬落去一層層，炒蛋份量都算多。沙嗲麵濃而唔咸，喺灣仔都算高質茶餐廳，價錢就$38，唔算太平亦唔算太貴。

今日放假同屋企人嚟食lunch…今次叫咗午餐 咖喱魚柳拼蝦球 魚柳好大塊 炸到卜卜脆👍🏻另外叫咗個 日式豬扒拼鰻魚呢個正常發揮仲叫左 麻辣海鮮炒烏冬配料夠 唔孤寒 好惹味

灣仔新開冰室，食過好多次，水準一樣保持到。cp 值好高。疫情關係、少左人堂食，繁忙午市時段好快就有位入座、而且仲唔駛搭台。是日食左法式黑椒焗牛扒飯，出餐速度好快，幾分鐘就送到我面前，同野飲時間甘無幾。先講個配搭、西冷牛扒配黑椒汁真係無敵。天氣凍時用焗飯方式程現真係加分。味道方面，牛扒處理得唔錯 、明顯煎過。但又唔會好乾身。底味適中、又唔會搶過黑椒汁。至於焗汁方面，原本黑椒就好霸道、但整體配搭芝士、焗出黎好香口、一啖牛扒一啖飯、食下食下就成個飯落哂肚、少有冰室可以做到。另外午餐外賣做緊特價50蚊。同附近餐廳即走外賣差唔多價錢，但勝在即叫即做一樣包湯包野飲。不過襯疫情冇乜堂食，試下熱辣辣出品，未嘗唔係一件壞事，大大提高左cp值，食得好享受，又坐得舒服

如題 每一次都漏 特登街頭行去街尾買 每一次都有驚喜焗豬扒飯 可以唔係焗 多士走油 無走到 都算！咖喱豬扒飯可以 漏咖哩 今次勁 蔥油雞扒冇雞扒😂 然後同你講 下次再食過 ？ ？ ？ ？ 即係今餐唔食？…………………………………..一次又一次既驚喜 聽電話既呀姐勁 打漏 比漏 可以講到係叫外賣既食客錯😂😂 每一次諗住算 每一次都係咁 毫無改善建議買外賣真係要喺嗰到睇左先 睇岩先好走 真係真心嬲！ ！ ！ 仲要態度極差 每次打落去叫外賣都話一係fax 一係whatsapp ？ ？

前幾天，早上要到香港會議展覽中心工作。下車時，看到這家冰室，便進去吃了一頓早餐。我叫了一個套餐，包括丹麥多士、炒蛋及沙嗲牛肉麵。餐廳送餐速度十分快，不消5分鐘，所有的餐點都已經送到。沙嗲牛肉麵分量十足，沙嗲是偏甜的，適合不太喜歡吃辣的人。由於餐廳已丹麥多士為招徠，我對丹麥多士有一定的期望。然而，丹麥多士卻沒有帶來太大的驚喜，不算太脆，興街上麵包舖買到的差不多。如果你要到會展工作，又想快捷地吃一頓早餐，這家冰室會是一個合適的選擇。

第二次去呢間冰室食，第一次食覺得唔錯，食個常餐有牛角包跟都幾好，但係今日再去食個侍應同我講話俾人投訴個餐牌所以個牛角包變咗要加5蚊，本身個常餐49蚊，轉牛角包加5蚊，最過分凍飲加6蚊，加加埋埋60蚊食個麵餐我就覺得唔抵食啦，好想知個客唔通投訴價錢平得滯😮‍💨所以我叫個午餐算，點知有頭髮加料🤦🏻‍♀️仲要上次叫外賣收多錢，同個收銀阿姐講佢佢話你唔即日講，咁冇㗎啦，我只係想話叫佢下次收錢小心啲，但佢嘅態度話俾我知係咁架啦你吹呀😒

今日係第二次嚟呢間冰室食野，夜晚8.9點都好算好多人。呢度全部都係卡位 又夠闊落所以都坐得好舒服😌今次叫左*焗咖喱吉列豬扒飯*好大塊吉列豬扒~好好食唔會炸到乾爭爭咖喱好正岩晒唔食得辣嘅我😋

由於成日都會黎灣仔，所以一有咩鋪頭變動就好快留意到。呢日見到新開左間”丹麥冰室”，裝修都幾好，坐得舒服，叫左佢地既本店推介「蜜汁叉燒湯意粉配火腿奄列配牛角包（可選牛角包/丹麥多士/蒜蓉多士）」HK$ 49 同埋 「招牌咖喱吉列豬扒飯」HK$ 62 黎試下！蜜汁叉燒湯意粉配火腿奄列配牛角包HK$ 49 呢個黎得都幾快，個蜜汁叉燒唔錯，湯意粉就普通，火腿奄列偏油同唔夠Juicy，牛角包以為係脆皮，但係普通面包皮，整體無乜驚喜，一般般啦招牌咖喱豬扒飯HK$ 62 相反個招牌咖喱豬扒飯就有驚喜，等左好耐，係唔多食完第1個餐先黎！不過唔緊要啦，因為佢個炸豬扒係好食，外脆肉冧，厚切，咬落去淡淡肉，炸得岩岩好，配埋啲微辣咖喱汁，真係好惹味啊！滿足！可以抵消返等候時間！唔知係咪因為新開，見到有個著住廚師衫嘅人行嚟行去，周圍問人好唔好食，我諗都係加分位嘅，起碼好唔好食都可以即刻話聲俾佢知先

呢間喺灣仔新開張嘅丹麥冰室連日來都有好多人排隊，抱住試新野嘅心態去食，食完之後覺得真係值得排嘅！最後我地都只係等左5分鐘，就可以入座了。先講交通，對正軒尼詩道，一出灣仔地鐵站行5分鐘就到，非常便捷。餐廳門面亮麗，以白色為主調，俾人一種乾淨企理嘅感覺。入到去，店內人滿為患，我地獲安排坐喺近門口嘅二人枱，同走廊嘅距離極近，一唔留心就會同捧餐嘅侍應撞埋一齊，雖然茶記午市繁忙係正常，但係呢間嘅環境又的確比其他茶記擠逼得多，所以單論呢一點，感覺麻麻。食物方面，我嗌左當日嘅午餐C：洋蔥汁雙扒(豬+牛)配薯菜，味道唔錯，份量亦足；餐飲嗌左熱奶茶，味道亦唔錯；但最人驚喜嘅係佢居然有餐湯跟！外面嘅茶記好多時跟餐飲就唔跟湯，佢呢度兩樣都俾哂你，算係幾難得的了！價錢方面，午餐盛惠$60，呢個價喺灣仔午市嚟講算中價，性價比嚟講都唔低架！服務方面，侍應們好盡心，送餐效率亦都高，不過午市時間忙中有錯都少不免，見佢地有時落錯單、有時就漏單咁，睇嚟新開張嘅餐廳多數係咁，大家出外食飯時就要俾多少少耐心了！

行經過灣仔修頓球場入埋來，隨便點左兩個小菜，配埋飯同飲品。一上來個牛小排熱氣騰騰，睇來幾有鍋氣，一啖食落口，唔會錯，黑椒又唔會好辣，好香口的薯仔最重要入晒味～粟米🌽魚柳，魚柳大大塊，每一塊都裹著濃滑粟米汁，啲味道配飯一流服務人員都好nice 個個有講有笑，仲會溫馨提示，滿面笑容，整間餐廳的氛圍很融洽，我一定會繼續幫襯～～

今晚去哩間丹麥冰室食嘢，諗住新開張啲嘢食麻麻，㸃知大有水準，伙記又有禮貌。。唔該前，唔該後，又多謝有句，值得再食，或者係新張期間，搏到一啲啲食客再幇襯，都可再去食。。