住家菜

營業中

休息中

又夠鐘做孤獨的美食家，收工自己買外賣，話說之前係另一間食過兩餸飯質素比較差，今次就搵到呢間未食過試試，原來呢間住家菜都開左好幾年，平時行開新北江都唔多覺以為開左無耐，都未幫襯過，今日就試下啦。大約晚上7點到人唔算話好多，睇返價錢其實都唔算平，兩餸飯都要41蚊無野飲，3餸更要60蚊，餸既選擇大約十幾左右，賣相睇落都幾靚，成個買飯過程超光速，唔洗唔洗20秒搞掂，所以就算人多排隊都好快清龍，阿姐既態度都尚算ok啦。揀左兩餸要左蓮藕煎肉餅同炆豬手，個量呢，就真係幾多下，蓮藕肉餅有3塊，豬手有5大件，飯都唔少。先講個飯就算正常，唔會好濕好笠，少少黏，飯香味都有d，ok既，豬手炆得都夠腍，腍得黎唔會好爛，都好入味，而且都算乾淨同無怪味，蓮藕肉餅就誇張，好厚身，豬肉比例比較多唔會好粉，蓮藕粒就偏少d，咬落入面竟然仲有d肉汁唔會好乾，面頭仲有d泰式辣醬增加風味。雖然話41蚊食個兩餸飯未去到話好平，但餸菜同飯量真係幾多，我係餓到就暈既狀態下都勉強剩左1塊肉餅同1件豬手（無浪費留左第日食），而質素都唔差，細食既朋友可能1盒夠2個人食tim，有時唔知食乜既時候呢間兩餸飯店都係幾好既選擇。

今日放工晏咗少少，加上香港而家疫症好似未受控制，政府禁止六點後晚市堂食，作為一等良民又唔想自己買餸返屋企慢慢煮餸洗碗，唯有睇吓有咩外賣食。🤔長途跋涉係旺角返到大西北，返到屋企附近新北江商場有間外賣店排長龍，走去睇吓有咩好嘢啦。原來係兩餸飯，重有好多款式可以揀添😍我就揀咗咖喱雞同埋西檸雞，睇落個飯盒都幾大盒。返到屋企涼都未沖就開餐啦，咖喱雞冇咩雪藏味，薯仔幾淋幾入味，西檸雞幾鬆化，好可惜啲汁就唔夠😫食到最後啲雞唔夠汁，真係食唔落口😅整體來講$41嘅兩餸飯，絕對係收晒貨🥰

這家在屋邨商場內的小店也開了一段長時間了, 每逢到吃飯時間, 他總會排起長隊, 亦是因為他的出現, 在他旁邊也開了一家相同種類的食店, 希望能分一杯羹, 但兩者還是有差別, 我個人傾向這家多一點! 這家我也有原來的35元兩餸飯吃到現在37元的兩餸飯, 深感通漲的痛苦, 但這家還是能的保持水準, 份量仍然給得很足夠! 我甚至覺得這裡的一餸飯比很多食店的正常飯也多, 在這個時候能有便宜又好吃份量又多的食店也算很良心了!我這次選了生炒骨, 咖哩雞和茄汁豬扒, 其中推薦生炒骨, 因為他就算拿回家還能保持一定脆度, 這很難得, 其他菜的味道也不錯!

呢一間係主打外賣飯盒或餸菜嘅食店，以健康為主，同啲名一樣，主要係住家菜。用餐方式：只供外賣自取。輪候時間：平時約5-10分鐘；晚市嘅時候，人會較多需要排隊而且需時更加耐！食品方面：單餸（$35）/雙餸飯（$40）：每日都會提供多款唔同嘅菜式，包括西檸雞、咕嚕肉、黑椒牛柳、西蘭花炒牛肉等等，顧客可以隨意配搭自己想要嘅菜式，相對較容易控制飲食嘅取向，例如多肉少菜或多菜少肉等等。而質素亦都唔錯，味道良好，識落明顯係用較少嘅調味料，相對會較健康！價錢唔貴，人均消費：35-60蚊左右。總括而言，唔錯嘅食店，有時唔想自己煮飯，又可以食到住家菜，的確係一個唔錯嘅選擇。

🍚兩餸飯($35)🔻推薦指數:🌕🌕🌕🌑🌑甜度:鹹味🌑🌑🌑🌑🌑質地:多汁! 多餸!🔺今日諗唔到食乜好，久違的兩餸住家飯，今次係我第二次食，都係無咕嚕肉🤣不過都有7-8款揀~實有一款啱你口味，今次揀左黑椒牛肉餅同咖哩薯仔雞！其實我係瘋狂汁撈飯控，多到好似湯飯咁就好開心😃因爲都多人排隊！我同個姨姨講要「多汁」佢勁好態度😯因爲好多個d外賣 茶記 都厭你煩“汁係咁多就咁多，仲多乜汁，有就有無就無，唔休做咁🤯” 依到係好好地仲話驚我多汁個裝餸位會漏出泥，直接幫我抔係飯上面好無！(看圖薯仔雞個邊係爆料得好澎湃🤤)然後佢勁好咁話牛肉餅要不要都多汁？我見其他人叫都只係用夾 夾幾塊牛肉餅，係我個份 仲係後面拎左兜嘢 額外倒左d黑椒汁🤩👍雖然影得有點醜，但還是想介紹一下，牛肉餅一食入口有被驚艷😍係豉椒炒河陣黑椒味！平時個d汁勾芡到好似鼻涕，依到個汁稠度剛好，黑椒辛味十分惹香~牛肉餅係好似酒樓牛肉球但juicy版，配埋洋蔥 爽脆更好吃😋然後咖哩薯仔雞個咖哩汁都好好食，唔係日式個種甜甜地，中式的味道，少少辣😚薯仔大舊外淋中間少少爽身，好有口感，不會太淋一pat，又入味，雞肉都不會柴，而且啖啖肉，米飯就正正常常，

唯一唔好嘅地方只係嫌佢油太多（真係唯一架咋），炒嘅菜都好香，好似食緊屋企煮嘅，仲可以免費多飯，學生中午有送嘢飲，都幾豐富，某啲餸會間中轉吓，建議要平啲食就:兩個人分$33雙餸飯多飯，除開只係$16.5一個人;3個人叫三餸飯$51多飯，除開都係$17一個人，就算比較大食嘅都可以咁做，同埋啲餸都俾得好多，店員態度十分良好值得讚，排隊亦唔洗好耐，因為入面雖然細但佢地啲動作好快手，中午會尤其多人，但都只係最多要等5分鐘就有得拎走，好方便！

/其實兩餸飯真係唔差🍱<住家菜>🍚兩餸飯($33)▪️原來新北江商場有間兩餸飯，我一直都唔知 都幾多人買，學生，呀叔，大媽都好多😂-每日大概有7-8款唔同餸，其實我想食咕嚕肉，但今日無😭就叫左酸菜鯇魚🐟同蕃茄蛋🍳-🐟魚我就好鐘意食，所以見到有蒸魚都唔洗諗。👉🏽肉質不算滑，有d韌🙁而且得一小舊，偏少左d。但塊魚皮好好食🤤由其配埋d酸菜粒。👉🏽成件事無乜調味，偏清淡，d汁都無乜味。-🍅蕃茄蛋就貪佢有汁好送飯，叫左多汁🤘🏾😎蕃茄蛋個邊明顯滿滿爆汁。👉🏽相比魚，蕃茄蛋抵食好多😲好多料，d蛋又大舊又不會煮到過老👍蕃茄都好大舊。👉🏽蕃茄汁偏稠身，酸酸地幾開胃，但味道不算太驚艷。👉🏽如果會配d菜就好🌱....

天水圍冇咩兩送飯食，知道呢度有一間，所以馬上試試。送既選擇唔算多，有6-8 款左右，肉多，唔係有太多送吸引到我，所以淨係叫左個淨送，$48 洋蔥蕃茄豬扒，份量唔算少，一盒有5-6 塊左右，敗筆是汁就太少了，送唔到飯，我見佢其他送都冇咩汁，好似好難送飯甘，味道都ok, 建議可以再酸啲，冇咩雪味，但價錢方面有啲貴，如果賣$40-45就抵啲，所以下次未必再淨送。題外話，點解openrice 一定要200字以上先可評分，甘樣咪只會令到更多打手打成篇論文甘，變到好似公式化甘，真正用者係有碗話碗，有碟話碟，洗咩要人地打到天花龍鳳甘...... 好快呢度變成打手app。

此餐廳是外賣自取，適合好似我咁帶返家中一路睇電視一路食飯的人，七點去到已有十幾二十人排隊，唔緊要，排左5分鐘已到我，呢到冇餐牌。每日師傅煮乜就賣乜，日日唔同，不過咁啱有我喜歡食的涼瓜牛肉及炸豬扒，買了個兩餸飯都係30蚊，加4蚊就有汽水，由於買埋俾老豆食，所以加48蚊買多個淨餸，姐姐好有禮貌，想多飯就俾多一殻我冇加錢，最後買左番茄蛋及咖哩，剩餸就涼瓜牛肉，食落真係好食過一般茶餐廳，感覺似屋企飯，牛肉裡涼瓜好入味，咖哩汁杰撻撻最啱撈飯食「住家菜」果然名不虛傳