八寶清湯腩

營業中

休息中

我心目中best 3清湯腩，八寶一定榜上有名。呢間店我真係又愛又恨。愛係愛上佢獨特嘅湯頭，恨係恨我識得太遲。由紅磡兩間舊舖位置開始，到收到結業嘅消息，休息一輪再次出發，今次去到天后區，位置唔算難搵，人流仲幾多添。清湯蘿蔔爽腩河粉（$78）可能有啲人對於呢個價錢食一碗粉會有少少卻步，不過，湯頭係呢度嘅獨特之處，有藥材味亦有少少甘甜餘韻。爽腩帶有筋膜，食到爽脆嘅口感；加埋藥膳湯底，一碗河粉就帶來大滿足。清湯蘿蔔三寶飯（$88）三寶包括牛腩、牛肚同牛筋，湯頭比河粉更為濃郁，適宜送飯吃。牛筋燜得夠腍，牛肚夠入味，同牛腩間住吃最好，又可以呷啖湯撈飯食，每當我掛住清湯牛腩就可以移師到天后黎食了。