勇記海南雞

營業中

休息中

太急促，好似要倒落去咁，職員見到你就嚟食完就已經望住你，準備收你啲嘢，催促得太過份，見你食完之後，總之40分鐘都未夠就同你講出面有客等緊。知你多客嚟食，但都要顧及吓其他食客嘅感受㗎！

海南雞飯（$66）個雞係幾好食連雞皮都醃得超入味油飯都幾好食但覺得有少少偏乾同埋可以再加啲味冇諗過個湯比到驚喜之前食金雞嗰啲係落南瓜勇記落紅蘿蔔成件事協調好多椰子味又好夠出但店員都幾冇禮貌頭頭對正冷氣同埋風扇又有開就禮貌問啡短頭髮女店員可唔可以閂細少少個冷氣其實如果佢話唔得呀較唔到/老細唔俾都算點知佢勁寸話 吓仲閂呀 已經好細喇喎 再閂就熱完全唔helpful 有冇諗過幫個客調位都解決到件事有諗過會唔會係伙記行嚟行去係熱過食客所以開咁大但佢明明自己都着長袖衫😂

👏🏻每次經過呢一間海南雞飯都大排長龍，我喺上網見到佢嘅評價都幾好，今日咁啱喺附近同朋友喺上環就決定同朋友試吓呢一間海南雞飯係咪真係咁好食！😛 我哋排咗15分鐘入到去，覺得味道其實都幾好，不過座位就有少少迫，海南雞都非常嫩，咁啱我有雞髀位，非常好彩，佢嘅肉質其實幾好食，再加埋佢本身秘製嘅醬汁！油飯同埋佢嘅海南雞配搭整體上都唔錯，我覺得呢個份量，如果普通晏晝食係夠飽㗎，價錢嚟講都唔算太貴重送一個椰子秘製例湯，都值得排隊，不過如果下午茶時間嚟食應該就唔會咁多人！

#勇記海南雞 早幾年前已經聽聞喺紅磡非常出名嘅勇記海南雞喺上環開分店，當時有唔少媒體報導，有次行過未開門都見到人龍，真係怕咗。之前行過見佢冇乜人排隊，就諗住去試下。以防萬一都係十二點前去到，真係唔使排，不過就一定要搭枱，因為都已經有好多客，雖然店舖好似好忙，但店員認真mode得嚟仲保持到基本禮貌，唔係一味話忙趕客咁款。兩大名物泰式海南雞飯同椰子雞湯$66，湯係好夠熱，啲煙係咁湧出嚟，好多椰子不過好硬食唔到，但離遠都聞到有椰子香。雞湯非常濃郁好夠味，留意到應該係接近全場都叫椰子雞湯。期待已久嘅海南雞飯，海南雞斬得夠大件亦比得幾多，唔同部位都有，最正當然係雞髀位，但空口食一啖有種白切雞嘅感覺，除咗雞翼比較入味，其他底味比較淡，味嘅來源嚟自泰式辣醬，夠辣惹味好食。本身對勇記都有啲期望，因為曾經被形容為海南雞天花板，今次食過確實係好食，但未至於神級，嫩滑程度同底味調教未算最好。加上環境唔大名副其實係一間小店，坐得唔算舒服食完就要走。勇記海南雞上環蘇杭街102號江寧大廈地舖

勇記海南雞 上環蘇杭街102號江寧大廈地舖 #勇記海南雞#海南雞#椰子雞湯#油飯#food#hk 又到Lunch時段，今日好想食海南雞一於去勇記，呢個時間太多人都係外賣返公司食算，趁今日介紹下。 招牌去骨泰式海南雞飯(油飯)，$66，外賣+餐具+$2之下$68。 海南雞份量頗多，雞皮入口爽脆，雞肉嫩滑，美味!沾上醬汁更惹味。 油飯粒粒分明，口感偏硬唔夠香口(一時時，有時正常口感)。 椰子雞湯，十分足料，椰香味濃，味道清甜，讚! 嘆個滿足的午餐。

上個月去左炮台山嘅雞少，雖然份量都足，但雞無雞味、飯太硬兼個湯唔知想點，如果大家唔記得可以去睇番嗰個食評。今次就要介紹番其中一間正嘅海南雞飯，上環嘅勇記海南雞。講真，位處蘇杭街中段嘅勇記，地點真係唔算方便，我諗如果唔係食過、喺附近返工、或者有人推薦嘅話都唔會搵到嚟呢個位🤦🏾之但係佢嘅出品又真係好食，雞肉嫩滑油份適中、油飯軟硬度適中、佢個醬唔係三色醬、而係類似泰式嘅特制醬，夠曬惹味。 （9/10）俾多個貼士大家，佢呢個飯餐有湯送，如果送曬就送杯茶。佢個湯好飲，但非常搶手！晏左少少到都會無曬。就好似我今日咁就同個湯無緣🥲 所以建議大家如果想試佢個湯要喺食晏時間早d到呀！

真心食得好急。正常用餐時間都唔容許。30分鐘內請離座。最差係用餐體驗，店員由落單到食緊野，都好高壓𥄫住、催住想你快啲交枱。成間店係用店員眼神、言語、收枱極快，去營造一個高壓嘅環境。當日午市，約12:30二人用餐無需等位，直入，要搭枱係可以理解例如1. 坐低店員企住喺你隔離問你食咩，其實餐牌都未打開 ，我地係直入餐廳無需排隊，根本無事先睇到餐牌2. 我話睇睇先，個店員照企喺隔離唔會行開3. 一路食，睇住坐對面兩位食客，不斷俾店員逐樣收枱，飲湯見你放低碗、匙羹，見差不多飲到底就即刻伸手收碗，睇住位食客無奈用手護碗話未飲完4. 食完牙籤了下牙，店員已大聲對店外等入座客叫「兩個就有，好快！執完枱比你！」有心無心都好，其實聽到啲說話真係好大壓力，明係逼你即走，出哂口術比壓力你呢間舖食野，你只可以一口氣，唔好停，入座即點餐，飯餸嚟到就喺咁食，停一停都會比人收碟野食係ok，店員我相信都係聽order做野，縱使表面好似有基本禮貌，但成個用餐氣氛好差，食得太辛苦，傾句計都好似有罪。講真，又無人賴死唔走，使唔使咁chur?

店舖門面比較細，晏晝要長期排長龍。可以嘗試晚市去食，性價比高，味道是得出冇味精同埋冇雪味，算係中上環海南雞不錯嘅選擇。服務都可以接受，門面都唔係大陸人唔會大呼小叫

味道🤌🏻公道講，食咗多好多次 每次味道都keep到幾好味。服務💩不過服務嚟講，學劉德華先生話齋就緊係唔合格啦😕每次黎食都會要求多飯 咁今次都唔例外。不過今次個所謂"多飯" 仲少過隔籬枱普通飯嘅份量🤣咁我就緊係即刻問職員啦，而職員都即刻好一罐香港服務業Style咁即刻否認，話哩個已經係多飯嚟🥴🤙🏻其實飲食業而家市道已經唔好，香港食客亦都越嚟越注重服務質素。如果今時今日仲係咁嘅服務態度嘅話，咁真係要再努力啲先可以挽回失去嘅客源😅

呢間嘢之前好似喺社交媒體網站有人報道過，算係稍有名氣。路經上環分店，就決定試吓. 💡嘩，不過一試真係不得了，叫咗個招牌海南雞飯，啲雞就唔算太嚡，不過冇乜雞味。🍗😕 個重點係個油飯搞唔掂，完全冇油香，可能叫白飯仲好過🍚❌ 個沾醬都唔係太好食. 😔另外間餐廳嘅服務都10分麻麻。明明間舖入座率可能得兩成，但係都逼我同人搭枱紙巾亦都要$3一包。簡單嚟講呢間嘢名過其實，不值一試！🚫😕難怪成晚都冇人排隊，哈哈！

早幾年就想食勇記海南雞😂有次三點幾去到紅磡店竟然賣晒😳今次12點前到達上環店😆毒L一個人直入有位坐！Openrice 有人講服務態度好差😦但我覺得啲侍應姨姨都無乜野呀，算有禮貌嘅🤣第一次食直接打大佬，叫左個招牌去骨泰式海南雞飯 轉全脾😎落單20秒就黎左碗椰子雞湯！再過多1分鐘左右黎埋個飯😆同澳牛有得揮！油飯幾香口，唔會過分油膩，上面仲有啲脆口炸蒜😚雞髀去骨去得好乾淨，見唔到有雞毛🪶雞皮爽，雞肉嫩，唔多肥膏，但係雞味唔太濃！好彩佢個醬汁ok好味，微微地辣帶返啲雞味出黎！旁邊有少少生菜絲同兩塊算厚切嘅青瓜🥒講返個湯先，幾好飲，單味道黎計仲出色過個雞飯，所以最後我飲哂成碗😛又所以，食完出去過左3分鐘我開始好口渴🤪整體評分我比佢 75分啦，都食得過嘅😌

最初都係YouTube 見到有人介紹但以前要過海先食到依家上要有就可以試吓上環勇記👍🏼好想試個雞湯，但次次都試唔到，因為次次都係夜晚先黎食，希望夜晚都有供應，海南雞真係好推介👍🏼

今日食午飯，想試下地道的海南雞飯及跟餐的椰子雞湯。海南雞非常嫩滑，配上爽脆可口的青瓜。飯底是油飯，另外配上一個酸酸的醬汁。椰子雞湯頗清，而且真材實料，放入椰子片在內。

我和太太17:55入座,開始睇餐牌就有職員問食乜？我話睇睇先，跟住17:58落單兩碟飲及兩杯飲品，我食得比較快約18:15完，太太比我遲5分鐘食完，跟住就有一名職員在我身邊講58分之後自己計數順便收走兩碟食完嘅飯，我望一望張單原來有落單時間，我便知佢想知我夠時間走未，不過見佢無後續我便當無事，跟住過兩分鐘另有一位職員攞住我杯飲品問係咪唔要？我話未飲完佢就行開咗，跟住再過三分鐘又另一位職員攞住我杯飲品問係咪飲完，我直接話未佢就好無引咁行開，再過兩分鐘第三位職員又嚟攞住我杯飲品，我就話食餐飯半個鐘都未夠唔洗咁趕客呀，佢話唔係，係見……，佢都知衰唔再出聲，跟住就再無職員過來關心我杯飲品，最後我全程用咗29分食完一餐晚餐比錢離開。食物味道一般，叫做食得飽又唔太差，雞份量係夠，但無驚喜，但職員態度咁就唔會再幫襯，亦唔會推介比朋友，我知現時香港飲食業經營困難，有客當然想做多啲生意，但都要合理架。

讚1 湯真係好飲 係同類海南雞飯入面 真係無出其右 夠甜香 飯夠油香軟熟2 上菜快手 環境都整潔彈1 雞份量雖然多 但可能肉太厚 的確有啲嚡 皮唔爽 就咁食就真係普通2 服務的確係對熟客好過對生客