十勝牛和食料理 (已結業)

呢間係和食料理店,即係食日本菜既 估唔到幾出色,有驚喜~油甘魚拼章紅魚 厚切一份有五片 夠肥嫩甘香鮮甜 油脂唔多但入口好鮮味刺身切粒配沙律菜 沙律菜加上青檸汁蟹籽 切粒魚生粒 食之前拌勻佢入口清爽但食到肥嫩三文魚粒炙燒牛油果三文魚壽司 燒香三文魚特別香加埋牛油果蟹籽食,入口味鮮口感豐富忌廉海鮮意粉 多到浸住每條意粉既忌廉汁 麵條每一口都食到濃郁忌廉汁,有蝦仁,青口,帶子味道濃海鮮料多,幾大碟抵食飲品係涼粉雪糕梳打,青檸梳打,夠解渴好飲又清爽平均消費$300評分8/10天水圍天湖路2號天耀廣場地下L012號舖

搵唔到地方食野 見到呢間好多人排隊就試試佢啦🤗 餐廳睇落似做放題咁🤣🤣好大好多選擇~😉場地好大 坐位都好多 人流好旺待應生都好快手腳唔講得好好好好味 但以呢個咁平既價錢😉對得起質素~🥰🥰我地order左4個樣 埋單都係$160左右CP值高👍🏻👍🏻咖哩🐷🐽排飯 份量好大好足料~咖哩唔會太辣🦐🦐反卷~ 好好味 $48一口芝士 $38 呢個就麻麻地~ 因為好飽好滯🤧🤧而且佢既芝士唔好味 有d失真~場地好大 坐位都好多 人流好旺 但人同人就坐得近d

每次經過餐廳都要等位，都係外賣好，可食得舒服啲。最推薦佢嘅蟹子沙律，一個大size 的已經有兩個外賣盒，大大盤新鮮青瓜絲同蟹子蟹柳，撈埋沙律醬一齊食10分好味，又抵食。另外要咗個香川燒鯖魚，燒得啱啱好，魚肉香口都好味。呢個餐10分健康好味。

嗰日收工諗住食餐好啲嘅慰勞自己點知點知有個平陰女店長態度差到爆 仲要聽到佢喺耳機度同個同事講 好x煩個客！不知所謂 唔會再去食！ 仲有帶黑色框眼鏡嗰個類似女店長 又係態度極晦氣

早餐價錢十分便宜，三十一蚊就有一份早餐，但完全沒有專業水準， 這是天水圍食肆的通病, 點了一份吉列豬扒蕃茄 肉碎 通粉早餐 ，吉列豬扒是使用攪爛的 免治豬肉製成肉餅做的， 所以其實應該是吉列肉餅 ，真的大開眼界長知識了， 炒蛋 像蒸蛋， 蕃茄肉碎通有藥水味， 感覺像化學品調製而成 ，所以應該不會再光顧了

今日OT收工夜左，番到天水圍都8點幾，而家堂食淨係做到十點，咁就焗住要叫外賣啦！經過呢間十勝牛，見呢間餐廳都係度做左好多年，就試下佢啦！因為夜既關係，叫外賣既人唔係好多，好快就有得拎啦！炸雞軟骨呢個份量好多呀！大大盒裝滿晒嫁！而家食得出係岩岩炸出黎，係好脆好熱既！加埋少少椒鹽真係幾惹味！蟹子沙律（小）冇睇錯！呢碗係小嫁乍！其實都幾大碗嫁！好彩夜媽媽都幾肚餓，一個都食得晒既！啲菜都算新鮮，冇啲穿洞既情況，同埋咬落都爽脆既整體黎講呢個價錢地點，質素都過得去既！

係天耀搵唔到有咩好食 就去左天耀商場既十勝牛買早餐食本身諗住係十勝牛買個早餐 叫個豬排包早餐食 點知等成半個鐘 九點等到九點半 我差啲懷疑係咪跟漏單 真係出單出得太耐啦 真係無下次

啲間野入面個all back 頭 帶四方黑框眼鏡個女侍應態度極差 入到去想落單舉手叫左佢落單 佢應左我地 跟住等左好耐都冇黎 算 叫左第二個 後尾我地發覺我地枱冇水（其他枱全部一入黎就會放底水） 咁岩又係佢行過就叫佢 佢以為我地要落單 我就話落左喇 可唔可以比幾杯水我地 跟住佢應都冇應就走左 隔左一陣佢都係冇拎水比我地 但係佢又會拎水比其他岩岩入黎果啲人個喎 我第二次再叫佢拎水 佢就好晦氣行埋黎話等多陣係咪唔得呀 ！ 其實你唔想做就辭職啦！差到爆！

逢星期六會去天水圍，朋友介紹去十勝牛試吓，話大件夾抵食，即管去試吓。中午時段都好多人等位，但裏面好多枱，所以好快就翻到枱，我哋等咗十零分鐘就入得。除咗主餐牌，佢仲有個午市餐牌，$4x 有主食、小食、飲品，諗唔到唔叫嘅理由。大小姐熱愛烏冬，叫咗個醬油牛肉烏冬，可惜肉太韌、湯底又太淡，反而小食嘅蟹籽沙律壽司唔錯喎！見佢咁抵食，叫咗份三文魚腩，可惜肉質鬆散，亦無魚油香味，食落去霉霉爛爛嘅感覺。嚟到我嘅主食雜錦魚生飯，係今日嘅大佬，無論賣相同味道都好似廚餘，食唔夠一半就放棄。最抵讚係飲品，無出事即係好事。朋友吹奏到又平又好食，係咪我唔好彩？

十勝牛做野做到晏左，成３點幾４點先有飯食。👄勁肚餓！　一次過叫左２個下午茶餐😋食。一個都係廿幾蚊💰，加埋６０蚊都唔洗，但好飽！👍🏻扒芝士照燒雞多士🥪拼薯角🥔薯角係熱辣辣同超大舊！個皮脆脆地韌韌地咁，好食！餐牌係寫七味薯角，不過無七味粉係面😂，但最緊要都係好食姐！😘芝士雞多士都好足料，唔係得少少🤏餡係中間果d 而且仲拉到絲🧀熱食超正！🤤醬燒豬軟骨拉麵🍜🐷豬軟骨林得黎有咬口，正！醬燒唔知點解有種南乳味🤨，不過唔難食，味道我會俾中等。湯底係豬骨湯下午茶餐仲有熱菊蜜/熱飲送😙

Quite a lots of people waiting at night time A big portion of food , but the taste is normal Just for a try食咗個炒飯都正常但係偏油。不過勝在份量夠多 材料主打係銀魚仔都幾特別第一次試 又唔會話有腥味 不過個炒飯好味過嗰個麵包焗飯 因為嗰個麵包焗飯其實成個包都唔會食主要係食入面啲飯不過太濃 好似同個麵包唔係好夾 但係都平價

屋企樓下日食店，食過好多次，影過好多相，食評真係第一次寫。以屋邨食嚟講，算唔錯啦。西瓜汁由$5飲到$8，可能今日中秋正日啦，覺得稀咗。食物水準依舊，以前有芝士蟹籽軍艦，好唔開心冇咗。老實講，平民價錢，非一般水準，抵食啦!

三文魚刺身食得出係新鮮貨，餐廳都好大方，刺身切得幾厚身，性價比係高嘅。壽司方面比較喜歡嘅係海膽軍艦，飛魚籽軍艦同埋三文魚腩壽司。海膽鮮甜，紫菜都好脆身，飛魚籽係零腥味三文魚腩亦都好肥美，呢三款係值得推介嘅。芝麻雞翼都好唔錯，雞皮炸得好香脆，加埋芝士的確係無得輸，雞肉都夠多汁。整體嚟講會覺得再嚟幫襯嘅，因為性價比屬於中上，而且餐廳環境都幾好，夠光猛，上菜速度都快，餐枱與餐枱之間有足夠嘅空間，食客都食得舒服d

到朋友家相聚, 因為唔係太餓既關係, 到附近見到間和式料理, 有很多選擇, 簡單叫了天婦羅(不錯, 不會太乾, 有蝦有菜, 每款有些), 炸芝士波(太濟了, 芝士味不夠), 牛油果沙律(大讚, 醋剛剛好, 不多也不少),  香芒三文魚卷(這個一般), 鮮果汁也不貴. 

見到餐牌都好多選擇 點知上菜真係嚇一跳個石鍋烏冬淡而無味 最後要自己加返好多日本豉油先夠鹹石鍋烏冬上菜時已經唔熱 越食越凍個烏冬下面中墊好多菜 完全唔夠食我係一個細食嘅女仔都覺得唔夠食 可想言之份量幾咁少另外叫左個滑蛋豬扒飯豬扒夠大份但係又唔熱又冧真係冇下次...