大良鴻輝記

營業中

休息中

After having dinner with my friends, and we have walked around in City walk, then we want to have a dessertAs we want to have some hot stuff,so we went to this restaurant.It had been opened for many years, which sell traditional dessert,And i ordered 杏仁糊 which is taste rich and think.it is hot enough and the portion is suitable for me to eat.And the price is really reasonable, it is not that expensive at all .

同阿妹去完補習，又唔想咁早返屋企，所以走入呢間舊式糖水鋪坐下同hea下，補充下d能源先。阿媽成日話我氣血唔夠，脾胃又差，要多d食紫米露，所以我就揀左凍清心丸椰汁紫米露【$24】。清心丸係一樣好得意既配料，望落晶瑩剔透，雖然無乜味，但就係鍾意佢果種煙煙韌韌既口感，加埋偏甜既紫米露就剛好平衡到味道，個人十分喜愛豐富既口感，仲有一口椰香。阿妹成面豆豆，我就揸主意幫佢叫左碗凍綠豆【$17】，見到煲到好綿起晒沙，阿妹話成個味覺都好清新，成個人透心涼，希望對佢d暗瘡有改善啦！

今日晚餐同男朋友去左食素，之後男朋友話個肚好空虛，於是走左去食甜品，又比我地心靈相通，大家都咁橋想食喳咋，男朋友話熱食先有益，所以幫我叫左碗熱嘅，但佢自己就走去叫碗凍嘅，真係比佢激死！叫左呢度嘅凍熱喳咋一樣一碗(各$22)， 紅豆、眉豆、三角豆、紅腰豆、芋頭同西米乜都有，每啖有濃濃嘅椰香，好味豐富又有益，好有飽肚感，我覺得好似八寶粥，係好好嘅宵夜之選。 兩碗喳咋都真係好多料，d料煮到好有口感，唔似外面果d成碗水咁，算第有所值，滿足。

唔知點解呢排胃口好差，返到屋企都唔係好想食阿媽煮嘅無味飯送， 所以踢拖落街買左份極香口既煎餃子，但又勁驚食咁熱氣會爆瘡就後悔無比，於是轉個彎去買埋碗熱綠豆沙，係人都知綠豆清熱解毒，就算食左熱氣嘢心理上都好過啲嘛。打開碗糖水，唔…豆多，口感相當綿密、滑腻，唔會過甜，食熱氣嘢例必要配返碗綠豆先安樂，18蚊就可買個安心，抵食！

想唔到這間傳統甜品舖，會將各種食物與其功效寫在每張枱上！以4pm仍然如此多顧客，這裡－定有其吸引之處。我們飲完茶仍每人叫了－大碗糖水，芝麻糊很香滑，我試了朋友的紫米糖水，的確很清甜，其他朋友食了合桃糊、腐竹糖水、椰汁西米露，大家都很滿足。我們走時看見熱呼呼的燉奶，下次一定要試。

今次要推介俾大家嘅甜品舖就係我由讀書年代幫襯到依家,有10幾年歷史嘅大良甜品~鴻輝記。一去到好多人排隊,但好快就有位。我點左一客熱杏仁糊同薑汁湯丸一如以往嘅水準,杏仁糊夠香夠滑,薑汁湯丸(芝麻味)口感軟綿綿,但就甜左少少!總結:雖然有計埋感情分但水準依舊穩定,可以推介

幫襯左幾次，次次嚟食都會諗一d唔同嘅組合，將唔同嘅糖水撈埋嚟食，等自己多d新鮮感嘛！今次又繼續搞搞新意思，將熱合桃溝芝麻加湯丸，三合一價$27，幾抵玩！:> 合桃糊同芝麻糊都好香滑可口，飲落去甜中帶香，兩隻味都食得到，唔會話一隻味完全蓋過另一隻味，滋補又美味。湯丸就皮薄又滑，咬開更有流沙的感覺。下次呢個組合可以再ENCORE!~

同阿哥喺健身室做完gym真係熱到無朋友, 拿拿淋搵個地方坐低食返D凍野急速降溫. 一個叫左西瓜涼粉($24), 一個叫左凍腐竹糖水($17), 西瓜好鬼清甜, 又多, 同涼粉一齊堆滿晒成個碗, 好夠凍, 完全透心涼.平時阿媽都久唔久會煲腐竹糖水, 不過熱食居多, 凍食原來係咁涼快, 食落無咁甜, 多左份清新感覺, 亦食到少少豆香, 幼滑程度好似飲緊奶.

前排病左無晒心機同胃口食野，好慘，今日終於好返9成喇，Honey放左工之後仲特登由灣仔過嚟荃灣搵我，兼且買埋碗愛心糖水比我食，所以點可以唔寫返篇食評嚟歌頌下佢呢？！呢碗熱杏仁溝合桃糊，飲落完全感覺到係真材實料，好滋補，本身唔係十分鍾意杏仁糊個味，但Honey話有益又啱女仔飲喎，都唔知佢係邊度聽返嚟，識埋呢d女人野~好在杏仁糊有合桃糊平衡返個味就好接受到，濃稠程度亦好適中，希望飲完可以盡快100%好返晒啦！

家姐今晚OT到好夜先返黎，我好乖等佢返黎煮麵比佢食，佢都好識做，特登兜路去呢間舊式糖水店買外賣返嚟益我，呢D咪姊妹情囉！我見開始有少少秋意就叫左碗熱蕃薯糖水，湯嘅顏色好清，味道唔會過甜，蕃薯好多，入口清甜香滑，好味過之前阿媽煲果D >.<

今日天氣真係好熱所以經過見到糖水鋪就即刻入去食，都食過好多傳統中式糖水，見到餐牌有咁多涼粉、西米既選擇就諗都唔諗見係鮮果就簡西米露。等左幾分鐘上左睇落平平凡凡，食落成個唔會太甜，又可以充分解暑解渴，入面有芒果、西瓜、哈蜜瓜。。好味啊

荃灣區飯後要食甜品，第一時間會諗起路德圍，但執吓執吓得返松記嗰三間串燒三兄弟，松記永遠多人無食過，另外兩間有點強差人意。離開放棄之際，朋友突然醒起有鴻輝，即時雙眼發光。要等位，而且地方淺窄，坐得非常唔舒服，一食完仲會即時請你走。大部分碗有崩。糖水少甜，真材實料。凍食合桃糊沒有很香，但順喉，幾杰身。

試問有邊個女仔唔想皮膚靚架？！想靚就梗係要由內到外啦，咁先至持久，所以平時食野都好注重，會重點揀d對皮膚好既野黎食~呢度既凍冰花燉蛋已經成為左我既養顏補品，非常味美，又有營養，食落好軟滑，好似食緊布甸咁，凍食更加係透心涼，希望keep住食，遲d皮膚可以好似剝殼雞蛋咁白滑啦！

呢個星期瘋狂OT，可以話係無啖好食，好多時食完LUNCH後就係公司埋頭苦幹，收工後已經無心機食野 >.< 唔得，點可以咁樣對自己架？點無胃口都要搵D野食下，所以就一個人入左黎呢間糖水舖整返碗凍紅豆沙加湯圓，點都要比自己苦中一點甜！紅豆沙材料簡單，有埋蓮子，清熱解毒，煲到起沙好正，味道濃郁，帶有一D香甜味道，舌尖,勁涼快。加左兩粒流芝麻湯丸，個芯熱辣辣又夠流沙，口感軟綿綿，夾埋凍紅豆沙一齊食，一冷一熱，成個人即時醒神晒。

阿媽成日話豆類有益，所以好多時煮餸都鍾意加豆，豆角呀、荷蘭豆呀……不過成日整到無味無道，太啖口真係唔多想食~~其實唔洗阿媽講我都知豆類好有益，所以今晚夜收工，就外賣左碗凍馬來喳咋攞返屋企同阿媽Share~一打開睇到好足料，各式各樣既豆都好多好豐富， 一碗有齊紅豆、眉豆、三角豆、紅腰豆等等，食落甜得黎帶清香椰漿味，唔會甜到膩，凍食仲特別解暑潤喉添，健康又好味~