太興 (沙田廣場)

營業中

休息中

香港地，太興就同同翠華一樣 ，周圍都有，行幾步就一間行幾步又另一間。雖然太興有好多分店，但係lunch hour排隊既人仍然好多，成日都要等位。某日真係好想食肉餅，於是早左小小出發去排隊食太興1230到店門口等左大約10分鐘就可以入座店員上菜速度十分快，好有效率！叫左鹹蛋肉餅飯d鹹蛋略乾，同肉餅分離左，味道鹹蛋還鹹蛋，肉餅還肉餅，如果味道可以融合d，可能會再好味d。肉餅好juicy，呢一點加分，但係肉餅肥肉既比例有d多，加上白飯份量好多，每次都食到個肚好漲。然後餐飲推薦冰鎮奶茶奶茶十分之絲滑，值得一讚係奶茶同冰係分開，所以d冰溶個陣唔會稀釋溝淡d奶茶味，而係冰封，令到茶味保持濃郁，而且甜度適中，每次黎太興必點呀！埋單$61，lunch黎講食得咁飽我覺得好抵！

由於上星期錢客人約咗我喺呢度見面，我只係飲咗一杯凍檸茶少少甜，佢就食咗一個雪菜肉絲湯米粉套餐早餐，佢話我知啲湯米粉入邊嘅米粉質感味道非常之好，於是乎我今朝就試吓喇！雪菜肉絲湯米粉早餐包括：雪菜肉絲湯米粉：米粉真係係質感同味道上面都非常之好，肯定不是東莞米粉，也不是超力銀絲米粉，也不是天鵝牌米粉，我都想知邊隻牌子的米粉。雪菜肉絲的雪菜不太鹹，做得幾惹味，唔錯唔錯！牛油多士拼炒滑蛋牛油多士其實係一塊薄方包去咗皮，然之後烘脆，因為質感比較乾少少，所以應該係用多士爐而並非用坦克車爐烘的，餐廳提供一件包裝的牛油仔俾客人自己搽在多士上，雖然塊多士仲係熱熱地，但係我並沒有搽牛油。炒滑蛋質素OK。餐飲凍檸茶少甜原來凍檸茶少甜唔夠少甜，下次要叫少少甜，但係紅茶味香，沒有檸檬皮的苦味，卻有檸檬，唔錯唔錯！埋單$43，貴就係貴咗啲，但係沙田廣場租金昂貴。

今日OT 又落大雨 放工攰到都唔知食咩好 就求求其其甘入畫太興甘落雨當然想食返d暖野 一打開menu就俾黎個吸引住胡椒湯魚肚雞鍋(跟爐) 套餐 $93落雨天 一見到胡椒湯就心心眼 黎d天氣真係想暖下腸胃 仲有好補既雞 成個鍋睇落就好吸引 賣相都好靚不過一切都俾佢呃左 係地獄級劣食 成個湯既味道同平時合x道個杯麵既湯底一樣 以甘既價錢食d甘既質素 真係但d雞係滑既 不過全部料都係無咩味 好淡鹹檸水(跟餐) $0雖然俾左半個鹹檸 但成杯野得個鹹字 最多叫做鹽水

今早又來到沙田太興吃早餐，未到十時已見人龍，幸好我們只是二人，比較容易找到座位。打開餐牌，又發現早餐價錢又漲價了。現今香港的食店不時暗地裡加一至幾元一款食物，可惜工資一年才加得一次，打工仔確實生活艱難。加價後，餐牌上多了兩款早晨推介，但價錢一點也不便宜。～人氣早餐（$40）加了價仍能保持水凖。火腿米粉依然有一條青綠菜心點綴，煎雙蛋多士中規中矩，今早的柑桔蜜似乎淡了一些。～香煎雞扒滑蛋公仔麵 （$42）炒蛋是滑滑的，煎雞扒皮煎得微焦，雞肉不硬，公仔麵煮得恰到好處。雞扒麵的湯頗肥膩，幸好有青菜平衡。個人認為四十元或以上的早餐似乎是貴了一些，今後不會常常來吃了。

今日一早起身，落住大雨，喺商場避雨期間，行過太興，諗住入去食個餐蛋麵啦，點知好多人排隊，可能落住雨嘅關係，早餐繁忙時間真係要等位所以我最後都係決定叫外賣，咦！餐牌多咗個雞扒滑蛋公仔麵，諗都唔使諗就決定要呢個餐啦，返到公司，打開個盒，嘩！雞扒煎得好靚呀，顏色金黃，太興早餐最好就係可以分盒上，唔使驚啲面浸到林啤啤，試吓塊雞扒先，醃得夠入味，上面仲有啲蒜蓉粒，二個滑蛋就一貫作風，一樣滑到好似豆腐花。呢個雞扒面，可以食到幾次喎

今日賣甩左老豆，同亞媽去咗新城市shopping，睇左一輪有點累，亞媽提議去太興食個下午茶，咁我地就行去沙田廣場。今日下午茶唔算多人，唔使等就可以入座，呢間太興環境都幾舒適，地方都算大，入座後就梗係第一時間去睇睇餐牌睇下有咩下午茶食啦。媽咪今日話佢唔想食啲咁飽既野，又唔想食啲熱氣野，所以佢叫左件奶油包加一杯柚子蜜($38)，我就要左個奶油脆脆豬同一杯凍鹹檸水($41)。媽咪的奶油包同柚子蜜上枱，佢地個麵包用左厚切麵包，將佢分成四小件，用牙簽吉住，等客人方便食。練奶唔算好多，啱啱好果隻，麵包好軟熟，柚子蜜唔係太甜，幾香柚子味。而我的奶油脆脆豬和凍鹹檸水也上枱了，豬仔包烘得好脆，一開二，搽左啲牛油有牛油香，但練奶就略為少左啲，唔係太食到練奶，凍鹹檸水有一舊鹹檸檬，篤散佢飲，鹹鹹地，夏天飲都唔錯！食完後就要快啲去會合返老豆一齊返屋企，如果唔係下次佢唔俾我同亞媽自己出黎架啦！哈哈！！！

最中意食太興嘅瑞士汁濕炒牛河~個人中意食啲有汁唔會太乾嘅菜式, 第一次食呢個濕炒牛河就愛上左。差唔多半年冇食, 上次嚟到轉左menu冇得食, 今日見到有就即刻嗌左🤤味道依舊咁好食, 每條河粉都沾滿香甜嘅瑞士汁, 牛肉夠稔又重肉味, 墊底嘅菜心都好翠綠同爽脆, 加埋少少炸蒜, 真係好好味😋😋最重要嘅係呢個粉係冇韭黃, 蔥, 啱晒我呢啲揀飲擇食嘅人😂😍但炒河唔好嘅地方就係多油, 每次食到一半都有啲飽濟。 因為太油膩嘅關係, 所以只可以隔一排先可以食一次😂今次仲試左木瓜雪耳燉豬展湯, 燉湯系列個底味都好似差唔多, 木瓜,雪耳同豬展都燉到好稔, 都幾滋潤👍🏻最後就試埋太興奶茶, 今次就叫左茶走, 奶茶同煉奶分開上, 比客人自己落, 唔怕會太甜👍🏻👍🏻

每次食親太興都會叫佢既招牌燒味食😛我就最鐘意食燒鵝🦢不過太興無得簡瀨粉😢唯有配米粉啦今日既燒鵝認真唔錯，個皮燒得岩岩好！但我分到既位就比較肥😂肥膏仲多過d肉但整體黎講，都算正😋

身為“沙田友”，點都要為沙田食店寫番幾篇食評嘅。強國人到港，去邊度食早餐？“太興” 是必然選擇之一；去太興食早餐， 我同太太都會早啲起身，就係去霸返個卡位，坐低之後，就通常會點這兩款早餐：糯米雞 & 餐蛋麵❕眾所周知，大興自誇所用的午餐肉是自家製造，事實上口味真是零捨不同，無論味道及口感都好豐富❗ 另外，糯米雞更是我的至愛，因為在別家店子食唔到咁高水準；唯一要彈的，就是他的咖啡、奶茶溫度不夠❗ 希望店子廚師盡快改善❗

公司新年每人送左張太興coupon, 見食下午茶唔使點補錢就食太興啦! 沙田li間太興點解無時無刻都咁旺場架? 😀•每張枱(even我坐的二人枱)都有暖水壺提供👍🏻.•重量級三文治 (HKD48)公司三文治嘅抵食之處係即叫即製, 每片麵包都會底面烘至金黃色, 所以夾左蕃茄都唔會令到麵包索水林唒, 層次分明嘅餡料雖然只係手到拿來嘅食材: 雞蛋, 芝士, 火腿, 但疊得係平均穩陣的, 生菜沙律夾蕃茄中間食落一啲唔dry唔熱氣, 一個人食唒有d飽添.•忌廉紅豆冰 (跟餐+HKD8)半杯忌廉(口感似鮮奶)半杯紅豆我覺得屬於一杯足料紅豆冰嘅黃金比例, d紅口感ok粉, 當然係再煲耐啲會更粉更好飲, 但加8蚊黎講都ok.

每次吃西藥個人特別容易肚餓，路經太興又不用等位，二話不說進去開餐先。我已經介口介了足足一星期，看見餐牌樣樣都很吸引。為了補充營養今晚要飲返個靚湯先，”濃香杏汁潤肺湯” 很大碗，好香好滑，果然係足料，湯內有很多豬肺及瘦肉。“蝦皇醬炒鮮魷芥蘭” 平時蝦皇醬應該是鹹香一點，這裡比我想像中清淡。“佛山燻蹄” 太興燒味部果然係保持水準，次次食都一樣好吃，燻蹄口感好不肥膩，我最喜歡。“冰鎮奶茶” 次次都飲，又濃又滑，一定夠凍，可惜無我份飲。本來今晚有點不滿，所有食物都到齊好一會，但白飯還未來，重點在始，有位侍應姐姐很好，親自幫我追，很快便送到，這樣的態度值得一讚。

好久已沒有到太興吃早餐了！今早不用等候便能入座了。看過餐牌後便發覺這裡的早餐是由我最初幫襯的三十三元升至現在的三十八元了。我將火腿通粉轉了我喜歡吃的米粉，這裡的米粉浸在湯內也不會變淋的、炒蛋依然滑滑、多士若不揸牛油的話便會乾些。若放炒蛋在多士上吃便美味了！😋柑桔蜜依然較甜但總比沒味的好，因我可以再加熱水將它弄淡些。這裡出名的午餐肉蛋出前一丁賣相非常吸引，味道也能保持！用的火腿餐肉是非平價早餐用的呀！最愛的是湯裏還加了一條菜心點綴。熱鹹檸水味道也不錯。早餐的價錢不斷上升，幸好食物的質素仍能保持！

今日過去沙田嗰邊做嘢，約了個客去下午茶tea一tea， 這個沙田廣場都有好多嘢食， 我個朋友話見呢間太興不算太多人，就入去坐下啦。這間沙田廣場嘅太興， 感覺真係不是太好， 首先係服務員掂行掂過，要叫幾次至會有人落單！我點了一個下午茶， 燒鵝湯米粉， 燒鵝很少而湯米粉有一陣好濃烈嘅肉味， 湯底味道怪怪地！我哋叫兩杯冰鎮奶茶，來了一杯之後，隔好耐至再來！好彩杯冰鎮奶茶都保持水準， 而我朋友點嘅肉燥米粉佢就話唔算太差， 不過下次我都唔會再嚟！

太興實在太過分了! 過時過節買外賣偷龍轉鳳! 燒肉又唔係特別好食，仲要俾人搵笨。琴日中秋節中午的時候，在太興買左條燒肉外賣番屋企，諗住同屋企人做節。我買左一條骨的燒肉，當時已經簡好，明明是一條完整的骨。當時，師傅即刻叫我出去比錢。我比完錢番到去的時候，已經斬好入左盒。我無特別留意，就直接拎左番屋企。到差不多食晚飯的時候，我先拎番出嚟打算換隻碟番熱。一打開盒就知唔係我買果條骨，因為全盒野有骨的位得2件，有d 唔知邊到嚟的燒肉皮，有好幾件超大件的肥膏，仲要有件係有2條骨連住的。而我當時簡的燒肉，好明顯係一條完完整整有一條骨的燒肉。你話唔係換左，搵鬼信呀。我打電話去投訴，負責人開頭都唔認，話"可能你舊肉入左焗爐，縮左水姐"。如果焗左會連骨都唔見左的，d 肥膏就仲會留得番係到呀？仲要我同佢講完一大輪道理，先話"唔錯都錯左啦，不如你宜家落嚟，咁我們換番俾你們。" 唔錯都錯左 係唔係即係佢哋自己知會偷龍轉鳳。另外，我們中秋打算做節的，食飯時間你要我再搭車落去你們分店再換完番嚟都成個鐘啦～ 老實講，你換俾我我都唔想落去。如果因為中秋節，唔夠燒肉賣，一係你講明叫我們買第二個位，我都無禁火。宜家係俾完錢

下午茶時間，媽咪想食燒味，所以來到附近最就腳的太興啦我們點了四喜臨門(燒肉、燒鵝、叉燒、燻蹄)，加＄19就可以轉套餐配白飯和熱奶茶。還有輕盈燒鵝湯米粉和冰鎮奶茶。驟眼看好像不錯的樣子。可是卻令人失望。先説燻蹄，沒有一點煙燻味，豬肉又乾又柴，皮的部分不夠爽彈。燒肉的皮都算香脆的，帶點鹹香，脂肪和瘦肉比例各一半。叉燒也不錯，帶點蜜汁，肥瘦適中，有肉汁。而本身我們最期待的燒鵝真是令人失望。皮不脆，肉不嫩。燒鵝的外皮已經軟掉了，皮的下層是多得過份的肥膏，只有丁點兒肉，而且肉很老，沒有肉汁。這個輕盈燒鵝湯米粉十分貼題，果然夠輕盈，燒鵝肉太瘦，又乾又柴，而外皮一早被湯泡得軟掉。米粉沒什麼特別。奶茶總算令人滿意，香濃細滑，不過冰鎮奶茶偏甜了一點點。另外，服務態度有待改善。侍應阿姐放下白飯的時候，沒有拿穩碗白飯，碗飯好像足球般在枱面碌了兩秒🤣，然後侍應阿姐的手指直插了碗飯裡，一句不好意思也沒有，也沒打算換過另一碗給我們。媽咪叫她再另上一碗飯吧，然後侍應阿姐黑哂面，隔了一陣子她將新的一碗飯大大力啪一聲放在枱就走，什麼態度？🤷🏻‍♀️ 之前吃過機場和銅鑼灣的太興，燒味都很不錯，但我想我是不會再去沙田這間太興