奇香冰室 (已易手) 新餐廳

我在亞皆老街一家琴行工作,每天都是下午茶和蛇王時候一定去奇香,明哥是樓面,老闆就打領帶西褲在水吧忙於工作,老闆娘就櫃面,後來老闆移民,明哥接替冰室,鮮茄牛意一樣咁好食,後來我都離開了這區,閒時都會再去找找明哥吹水懷念過去......60年前的奇香....是,60年前已經是奇香常客,到今天都一樣,點解你冇相貼出來,相係用來睇,最繄係情..味..真,唔係偽冰室..支持老冰室

因為之前表弟黎香港要去何文田個邊考試。考完就帶佢去附近食野。佢話想試下香港傳統既冰室，我就揀左呢間。一入去已經覺得好古舊，好有香港7-80年代既感覺，地方唔大，而且都要等一陣先入到去食。我地叫左招牌蕃茄牛肉意粉同湯意粉。再加左奶油豬同咖央多士。落單個陣要大嗌要食d咩，老闆就會記得，唔洗落單，所以怕羞d都唔得。味道方面，意粉就似屋企食到既味道，好熟悉既感覺。而奶油豬就推薦既，好脆好好味，有茶餐廳既水準。想食傳統既冰室味道，就可以試下呢間。

呢間暫時係我食過唯一一間有燴通粉食而又好食嘅地方。之前響澳門食過一間超級難食啲茄汁唔知點樣一啲茄汁味都冇 ，又唔夠rich食完不知幾後悔! 今晚因為時間尚早先至可以食到咋，因為呢間鋪頭七點半收工㗎 ！鋪頭由兩夫婦經營，見到好多都係街坊嚟幫襯，全部都熟晒㗎啦 ！之前間唔中過嚟呢邊上堂有機會食到，而家真係好難先有機會食 ！其實燴意粉坊間比較多，燴通粉真係唔係度度有得食，仲要好食果下先抵死吖嘛 佢絕配嘅小紅腸係我哋每次去都要必食嘅，因為又係唔係度度地方有得食到 ，連我平時唔係好食腸我都覺得好味道兩個人每人要一碟又好似太多，所以就叫咗一碟雞絲腸仔蛋燴通粉再加件多士 ，晚餐輕盈小小啦！佢啲茄汁全部掛晒上啲通粉度，味道啱啱好 ，再加兩條小紅腸同埋好靚嘅太陽雙旦。最遺憾就係佢杯奶茶始終唔夠大排檔嗰啲咁有茶味咁香濃！晚餐兩個人80幾蚊仲想點先😋😋😋

而家新開嘅餐廳好多時都會做懷舊做主題，做返舊式嘅裝修話擺設泥模仿以前冰室嘅風味。但泥到奇香冰室，就唔使扮了。因為明哥（冰室老闆）屹立喺勝利道已經好多年，懷舊就梗㗎啦！奇香冰室唔大，可能總共都得10張枱左右，明哥有佢自己一套運作，落單從來都係就咁嗌出嚟，即叫即整。佢又會記得晒邊枱人嗌乜嘢，加蛋定加腸仔啊⋯埋單都係好心水清～入到去，其實餐牌上面選擇都唔多。泥泥去去都係果幾樣。我入到去一係就鮮茄牛肉燴意粉或者清清地嘅就係三絲湯通粉其實好食嘅地方,選擇真係唔需要多!佢個燴意粉係食過最好味嘅，真係冇乜地方做到佢“燴”既個種狀態，諗起口水都流佢個種鮮茄亦唔會太漏，正啦總之！支持老店❣️

以前細個響勝利道附近番學，所以成日都會響勝利道食晏。諗番起畢業之後都有十年冇番過黎呢邊，見今日下就放假，成日冇食過野，所以就黎左奇香室回味一下。今次叫左蕃茄繪牛肉意粉加煎蛋再加底。以前明明記得中學時叫個正常份量會好快食完，會唔夠飽，所以今次叫左加底，點知食唔曬添，只能夠講當時發梗育，所以胃口大啲。牛肉保持到以前既水準，蕃茄意粉比起出面有啲林，不過以前響度食都係咁，煎蛋可要可不要，冇咩特別。如果女仔黎食，食番正常份量就夠啦。

難得今日返九五時間，中午時段到了勝利道品嚐及懷緬一下昔日的茄醬牛肉意粉，未到如以往一樣，當日仲見到有顧客從美國返港第一時間就係去呢度食嘢！真係一大班熟客！當天係平日，個場已經滿咗，又有學生等緊，可能就係因為熟客多，我叫左嘅意粉要等到我朋友差唔多食完，再要我三催四請先至有我嘅意粉上枱，佢將啲意粉首先俾咗啲熟客食先，最後先輪到我！ 唉！作為一個打工仔嘅我，食飯時間只有1小時，包括來回我都冇咗好多時間，所以如果真係去呢度食嘢你要有充足嘅時間可以慢慢食先好呀！我就要好急咁樣食完囉！而我朋友係第一次去食嘅，我問佢好唔好食，佢話好好食！因為呢啲就係香港式的意大利粉，就好似你呀媽媽煮嘅意粉一樣，充滿咗感情！佢嘅肉醬意粉底係由茄膏整嘅，所以同我地細細個食嗰啲意粉係一模一樣架！呢個茄醬意粉差唔多每枱都會叫㗎！唔似而家真係可以喺香港食到嘅正宗意大利粉！所以當你再食呢一個意粉嘅時候，你就會有家的感覺同埋好有親切咁！不過，真係有啲肥膩㗎 ，日日食唔係好掂！

入到店，見到老闆同熟客傾計，叫得出客既名既老闆就真係好少叫左个三寶意粉(完全係懷舊老店嘅風味，意粉吾會煮得太腍，不過番茄醬就比較酸)， 公司三文治(三文治都落足，有toast 到)，熱奶茶(同之前相比就比較失望，奶茶係滑，不過味道好淡)服務態度係老店黎講可以接受，職員嘅態度都很有禮貌相對等食物既時間會比較長，我哋叫咗三樣嘢大約等左15分鐘先可以食(如果趕時間嘅話就唔係太建議去食)甘岩隻貓貓有出黎同客人玩

今日啱啱嚟開何文田出差，即刻諗起勝利道上呢間有名食豉油西餐：火腿茄汁燴意粉嘅老店，係嗰啲舊港式茶記，煮到腍哂用豉油嚟吊味嘅火腿燴意粉，就係所謂嘅豉油喇！今時今日，仍然保留細個嘅時候食嘅嗰種舊味道，不過老實講，其實唔係特別好味，但當然絕對唔係差，更重要係特別有人情味！老闆見到十個客人入嚟，起碼超過一半可以叫得出佢哋名，仲會雞啄唔斷傾一大輪。今次嚟講，啲意粉唔算太腍，炒得好乾身又有咬口，絕對係家庭式嘅美味！另外，好開心今日巧遇貓店長出嚟巡舖！

12Dec2016, 星期日早上08:30左右順路經過，又再幫襯這間老店……又再一次失望……食物質素和價錢只是一般， 但老闆 奇哥的態度真是只有熟客才可以理解……我和仔仔叫了A 餐火腿治+三絲通粉和 B餐多士+火腿太陽雙蛋,老闆太緊持叫我們只用1份刀、叉、匙羹用餐，我想取多1只羹便抱怨問為甚麼，真是難以理解……十多年真的都無變過！

讀書時期已經去食lunch, 晏晝行過竟然唔洗等位， 梗係入去搵老闆明哥吹吓水兼食埋餐晏啦， 例牌茄牛燴意加蛋凍檸茶， 又唔可以話真係非常好食， 之但係keep到同做學生時幫襯嘅味道一樣已經冇得輸啦~

星期六若果早起身就會同媽咪嚟撐枱腳食早餐。每次去都係滿座, 有時要等位, 有時要搭枱, 雖然環境擠迫, 但都要嚟食, 因為鐘意懷舊冰室風味。每次嚟都必點三絲通粉餐, 蛋絲火腿絲雞絲湯通粉, 三絲份量夠多, 最鐘意夠晒雞味o既雞絲。跟餐有牛油三文治, 可以唔駛加錢就改奶醬多、油占多, 好難得。呢度由老闆兼任樓面侍應, 落單唔會寫單只靠老闆記憶, 所以難免有錯, 不過美食當前, 唔理得咁多, 懷舊冰室愈來愈少, 大家繼續支持下啦~

今早我們去咗何文田勝利道嘅「奇香冰室」買外賣自取食！我們買咗三寶湯通粉同火腿三文治！三寶湯通粉嘅通粉極之腍身，口感非常之唔彈牙，味道比較淡，鷄蛋亦比較「嚡」，但材料都算多！火腿三文治嘅包質唔係好鬆軟，而且相當乾身！真係令我們覺得好失望！

突然心來潮想重遊舊地🙄🤔🤔想當年返學會嚟呢度食lunch必叫燴意粉🍝🍴雞絲茄汁燴意粉 $33宜家茶記好少會有咁平嘅燴意粉😮😮多數都四十幾蚊💸💸💸💸不過呢碟份量比較細 但女孩子都夠食架喇味道冇一般食開嘅咁咸咁重味精 食完唔會好口渴蕃茄味都好濃 而且酸d開胃d一邊食一邊回憶以前校園生活 食得好開心 🍴三寶燴意粉 $33想要多d料可以叫三寶燴意粉三寶即係蛋絲🍳雞絲🐔同火腿絲🐷都係一樣價錢咋😋😋😋

許志安有首歌唱「流淚行勝利道‧‧‧」，我就唔係好明點解行勝利道要流淚啦？ 因為短短一條勝利道有好多寵物店，睇下d貓仔狗仔都幾開心ga wor，仲要幾多野食tim，而當中仲有一間老字號冰室-奇香冰室，已經有40幾年歷史ga la！之前同Mr.No都黎過勝利道食野，不過就係食呀坤哥比人X果間海南雞飯，今次出開旺角就黎奇香食返個Tea，順便試下佢地既燴意粉係咪真係咁正先？冰室不大，一個水吧，5張卡位加幾張細枱。只有一位年青人做樓面，可能食物種類唔多，見佢落單都唔洗寫低，直接叫入水吧，水吧裡面果位姐姐就會一路收order一路準備食物/飲品。Mr.No叫既奶油多$9加凍奶茶$14，一睇個奶油多就知有水準，多士兩邊都烘到香脆，搽滿花生醬同練奶，簡單滿足。奶茶就一貫茶記水準~雞絲燴意$33，除左雞絲，亦有鮮蕃茄同青豆做配料，雞絲係雞柳，唔鞋無雪味，意粉唔會好似一般茶記煮得太淋，略為煙韌彈牙，難得！茄汁不多不少剛好包住每條意粉，乾身唔油膩，茄汁甜酸平均，真係好好食~讚！另叫了一杯熱朱古力$13，朱古力唔係甜死人果種，有少少黑朱古力既苦味，喜歡！簡單食物用心煮亦能令人留下心刻印象，除左食，亦係好多舊街坊

好實在又滿足既一餐 (唔好expect有花巧野) 細細個嗰時每逢病咗去到茶餐廳都要叫既火腿通粉 ... 雖然奇香唔會再張火腿切絲 但係味道依舊 人情味亦依舊 食物 portion都好夠。午餐肉 (免煎) 加煎雙蛋 米 , 唔知點解覺得佢 d米粉米味特別香。